പ്രവാസികൾക്ക് ഓണം ഉത്പന്നങ്ങളുമായി ലുലു കാർഗോ വിമാനം
കൊച്ചിയിൽ നിന്ന് 45 ടൺ പച്ചക്കറി - വിഭവങ്ങൾ അയച്ചു
കൊച്ചി: പ്രവാസികൾക്ക ഓണം ആഘോഷിക്കാൻ പഴം, പച്ചക്കറി, വാഴയില തുടങ്ങിയ വിഭവങ്ങളുമായി ലുലുവിന്റെ പ്രത്യേക കാർഗോ വിമാനം കൊച്ചിയിൽ നിന്ന് പുറപ്പെട്ടു. നാഷണൽ എയർലൈൻസിന്റെ കാർഗോ വിമാനത്തിൽ ഇന്നലെ രാവിലെ 10:40 ന് 45 ടൺ പഴം, പച്ചക്കറി വിഭവങ്ങൾ കയറ്റി അയച്ചു. 60 ടൺ പഴം, പച്ചക്കറി, വാഴയിലകൾ എന്നിവയുമായി മറ്റൊരു കാർഗോ വിമാനം നാളെ പുറപ്പെടും. ലുലു ഫെയർ എക്സ്പോർട്ടിന്റെ നേതൃത്വത്തിൽ മൂന്ന് ലക്ഷത്തിലധികം പഴം-പച്ചക്കറി വിഭവങ്ങളാണ് ഗൾഫ് രാജ്യങ്ങളിലെ ലുലു സ്റ്റോറുകളിലേക്ക് എത്തിക്കുന്നത്. ഓണക്കാലത്ത് പ്രവാസി മലയാളികൾക്ക് ആവശ്യമായ ഭക്ഷ്യവസ്തുക്കളുടെ ലഭ്യത ഉറപ്പാക്കുന്നതിനുള്ള മുൻകരുതൽ നടത്തുമെന്ന് ലുലു ഗ്രൂപ്പ് ചെയർമാൻ എം എ യൂസഫലി പ്രഖ്യാപിച്ചിരുന്നു.
