കൊല്ലം: പോക്കറ്റ് കാലിയാണെങ്കിലും കയറിച്ചെല്ലാം. ഇഷ്ടമുള്ള വസ്ത്രങ്ങൾ തിരഞ്ഞെടുക്കാം. സാരി, ചുരിദാർ, നൈറ്റി, ഷർട്ട്, കുട്ടികളുടെ ഫ്രോക്ക്... ഒന്നിലും പ്രൈസ് ടാഗില്ല. പണവും അടയ്ക്കേണ്ട. ഇത് ചാത്തന്നൂർ കോതേരി എസ്.എൻ കോളേജ് ജംഗ്ഷനിലുള്ള ചങ്ങാതീസ് സൗജന്യ വിപണന കേന്ദ്രം.
കൊല്ലം, പരവൂർ കോടതികളിൽ പ്രാക്ടീസ് ചെയ്യുന്ന അഭിഭാഷകനായ എൻ. ജയചന്ദ്രനാണ് ഉടമ.
പാവങ്ങൾക്കായി എന്തെങ്കിലും ചെയ്യണമെന്ന ചിന്തയിലാണ് വക്കീൽ ഓഫീസിനോട് ചേർന്നുള്ള കടമുറി വാടകയ്ക്കെടുത്തത്. കൈയിലുണ്ടായിരുന്ന പണം ഉപയോഗിച്ച് വസ്ത്രങ്ങൾ വാങ്ങി കഴിഞ്ഞ ഉത്രാടനാളിൽ പ്രവർത്തനം തുടങ്ങി. ഓണനാളുകളിൽ ദൂരെനിന്നടക്കം പാവങ്ങളെത്തി വസ്ത്രങ്ങളെടുത്ത് നന്ദി പറഞ്ഞ് മടങ്ങി.
രാവിലെ ഒൻപതു മുതൽ 10വരെയും വൈകിട്ട് അഞ്ചു മുതൽ രാത്രി എട്ടുവരെയും അഡ്വ. ജയചന്ദ്രൻ കടയിലുണ്ടാകും. അദ്ദേഹം കോടതിയിൽ പോകുന്ന സമയത്ത് വക്കീൽ ഓഫീസിലെ ജീവനക്കാരി കട നോക്കും. ആവശ്യക്കാർ പലരും സന്ധ്യയ്ക്കുശേഷമാണ് എത്തുന്നത്.
വക്കീൽ ഓഫീസിന് 20,000 രൂപ ഡെപ്പോസിറ്റും 2500 രൂപ വാടകയുമാണ്. സൗജന്യമായി സാധനങ്ങൾ നൽകുന്ന കട തുടങ്ങാനാണെന്ന് പറഞ്ഞപ്പോൾ കടയുടമ ഡെപ്പോസിറ്റ് പതിനായിരമാക്കിയും വാടക രണ്ടായിരമാക്കിയും കുറച്ചു.
റാക്ക് ഒഴിയുമ്പോൾ നിറയും
സുമനസുകൾ സഹായിക്കുന്നതിനാൽ ജയചന്ദ്രൻ അധികം പണം ചെലവാക്കാതെ തന്നെ കട നിറയുകയാണ്. ഓണത്തിനും വിവാഹത്തിനും പിറന്നാളിനും സമ്മാനമായി കിട്ടിയതിൽ തങ്ങൾക്ക് ഉപയോഗമില്ലാത്ത വസ്ത്രങ്ങളും പാത്രങ്ങളും ഇലക്ട്രിക് ഉപകരണങ്ങളും അടക്കം പലരും ചങ്ങാതീസ് കടയ്ക്ക് സമ്മാനിക്കുന്നുണ്ട്. ഒന്നോ രണ്ടോ തവണ ഉപയോഗിച്ച ശേഷം അലക്കിത്തേച്ച് എത്തിച്ച വസ്ത്രങ്ങളുടെ വിഭാഗവുമുണ്ട്.
