ചെറുപുഴ(കണ്ണൂർ): കഴിഞ്ഞ തവണ നേടിയ 301-ാം റാങ്കിൽ നിന്നും ഇത്തവണ കഠിനാധ്വനത്തിലൂടെ സിവിൽ സർവീസ് പരീക്ഷയിൽ 57-ാം റാങ്കിലേക്ക് ഉയർന്ന് കണ്ണൂർ ചെറുപുഴ സ്വദേശിയായ ഒ.വി. ആൽഫ്രഡ്. ഒരപ്പനിയിൽ ഒ.ജെ.വിൻസെന്റ് ത്രേസ്യാമ്മ ദമ്പതികളുടെ മകനാണ് ആൽഫ്രഡ്.

ചെറുപുഴ സെന്റ് ജോസഫ്സ് ഹൈസ്‌കൂൾ, സെന്റ് മേരീസ് ഹൈസ്‌കൂൾ, തോമാപുരം സെന്റ് തോമസ് ഹയർ സെക്കൻഡറി സ്‌കൂൾ എന്നിവിടങ്ങളിലെ പ്രാഥമിക വിദ്യാഭ്യാസത്തിന് ശേഷം ബെംഗളൂരു ക്രൈസ്റ്റ് കോളേജിൽ കമ്പ്യൂട്ടർ ആപ്ലിക്കേഷനിൽ ബിരുദപഠനം പൂർത്തിയാക്കിയ ആൽഫ്രഡ് ഡൽഹിയിൽ ഒരു വർഷം സോഫ്റ്റ് വെയർ എൻജിനീയറായി ജോലി ചെയ്തു. പിന്നീട് തിരുവനന്തപുരത്തെ ഐ ലേൺ അക്കാഡമിയിൽ സിവിൽ സർവീസ് പരിശീലനം നേടിയിരുന്നു. നിലവിൽ ഗാസിയാബാദ് നാഷണൽ പോസ്റ്റൽ അക്കാഡമിയിൽ ട്രെയിനിയാണ് ആൽഫ്രഡ്.