കൊച്ചി: പാഠപുസ്തകങ്ങളും പഠനസഹായികളും നോക്കി പരീക്ഷ എഴുതാൻ അനുവദിക്കുന്ന ഓപ്പൺ ബുക്ക് പരീക്ഷാരീതി സി.ബി.എസ്.ഇ അടുത്തവർഷം പരീക്ഷിക്കും. അടുത്ത അദ്ധ്യയന വർഷം 9 മുതൽ 12 വരെയുള്ള ക്ളാസുകളിലെ ക്രിസ്മസ് പരീക്ഷയ്ക്ക് തിരഞ്ഞെടുത്ത സ്കൂളുകളിലായിരിക്കും ഓപ്പൺ ബുക്ക് പരീക്ഷ.
9,10 ക്ലാസുകളിൽ ഇംഗ്ലീഷ്, സയൻസ്, കണക്ക് വിഷയങ്ങളിലും 11,12 ക്ലാസുകളിൽ ഇംഗ്ലീഷ്, കണക്ക്, ബയോളജി വിഷയങ്ങളിലും പരീക്ഷ നടത്തും. മാനദണ്ഡങ്ങളും ചോദ്യരീതികളും 4-5 മാസങ്ങൾക്കുള്ളിൽ തീരുമാനിക്കും.
പുതിയ ദേശീയ കരിക്കുലം ഫ്രെയിംവർക്കിൽ ഓപ്പൺ ബുക്ക് പരീക്ഷാരീതി നടപ്പാക്കുന്നതിനെക്കുറിച്ച് നിർദ്ദേശമുണ്ട്. കഴിഞ്ഞ ഡിസംബറിൽ ഇതുസംബന്ധിച്ച സി.ബി.എസ്.ഇ കരിക്കുലം കമ്മിറ്റിയുടെ ശുപാർശ സി.ബി.എസ്.ഇ ഗവേണിംഗ് കൗൺസിൽ അംഗീകരിച്ചു. സ്കൂളുകളിലും കോളേജുകളിലും പരിചയമില്ലാത്ത രീതിയാണിത്. പാഠപുസ്തകങ്ങളിൽ നിന്ന് ഉത്തരങ്ങൾ പകർത്തിയെഴുതൽ മാത്രമല്ല, വിദ്യാർത്ഥിയുടെ വിശകലനശേഷികൂടി പരീക്ഷിക്കും വിധമാകും ചോദ്യങ്ങൾ.
പരീക്ഷണാടിസ്ഥാനത്തിൽ നടക്കുന്ന പരീക്ഷയിൽ ഉത്തരമെഴുതാൻ എടുക്കുന്ന സമയം, വിദ്യാർത്ഥികളുടെ പ്രതികരണം, മൂല്യനിർണയത്തിലെ പ്രശ്നങ്ങൾ എന്നിവ വിലയിരുത്തും. ആവശ്യമായ പരിഷ്കാരങ്ങൾ കൂടി നടപ്പാക്കിയാക്കും അന്തിമരൂപം നൽകുക.
• ഡൽഹി സർവകലാശാല സഹായിക്കും
ഓപ്പൺ ബുക്ക് പരീക്ഷാ നടത്തിപ്പിനും ചോദ്യപേപ്പർ തയ്യാറാക്കാനും മൂല്യനിർണയത്തിനും ഡൽഹി സർവകലാശാല സി.ബി.എസ്.ഇയെ സഹായിക്കും. കൊവിഡ്കാലത്ത് ഇത്തരം പരീക്ഷ സർവകലാശാല നടത്തിയതാണ്. പരീക്ഷാപേപ്പർ ഉൾപ്പെടെ അന്ന് വിദ്യാർത്ഥികളാണ് കൊണ്ടുവന്നത്.
• ആദ്യപരീക്ഷണം പരാജയം
2014- 17 കാലഘട്ടത്തിൽ മൂന്നു വർഷം 9ാം ക്ളാസ് മുതൽ 11 വരെ ഓപ്പൺ ടെക്സ്റ്റ് ബേസ്ഡ് അസസ്മെന്റ് എന്ന പേരിൽ പരീക്ഷണ പരീക്ഷകൾ സി.ബി.എസ്.ഇ നടത്തിയിരുന്നു. അന്ന് വിദ്യാർത്ഥികളും അക്കാഡമിക് വിദഗ്ദ്ധരും അസംതൃപ്തി പ്രകടിപ്പിച്ചതിനാൽ തുടർന്നില്ല.
• ബോർഡ് പരീക്ഷകൾ രണ്ട് വട്ടം
2025-26 അദ്ധ്യയന വർഷം മുതൽ 10,12 ബോർഡ് പരീക്ഷകൾ 2 പ്രാവശ്യം നടത്താനും തീരുമാനിച്ചിട്ടുണ്ട്. ആദ്യ പരീക്ഷ നവംബർ-ഡിസംബർ മാസങ്ങളിലും രണ്ടാം പരീക്ഷ ഫെബ്രുവരി-മാർച്ച് മാസങ്ങളിലുമായിരിക്കും. രണ്ട് തവണ വിദ്യാർത്ഥി പരീക്ഷ എഴുതണമെന്നും നിർബന്ധമില്ല. ജെ.ഇ.ഇ., നീറ്റ് പരീക്ഷ പോലെ രണ്ട് പരീക്ഷയിലെയും മികച്ച മാർക്ക് സ്വന്തമാക്കാം.
• ഓപ്പൺ ബുക്ക് പരീക്ഷ
വിദ്യാർത്ഥികളുടെ ചിന്താശേഷിയും വിശകലന ബുദ്ധിയുമാണ് പ്രാഥമികമായി പരീക്ഷിക്കുക. പരീക്ഷയ്ക്കിടെ കേസ് സ്റ്റഡികൾ നടത്താൻ ആവശ്യമായ മെറ്റീരിയലുകൾ നാല് മാസം മുമ്പേ നൽകും. നോട്ടും ടെക്സ്റ്റ് ബുക്കുകളും റഫർ ചെയ്യാം.
• നല്ല തയ്യാറെടുപ്പ് വേണം
വിദേശങ്ങളിൽ വ്യാപകമായ ഓപ്പൺബുക്ക് രീതി മുമ്പ് സി.ബി.എസ്.ഇ പരീക്ഷിച്ച് ഉപേക്ഷിച്ചതാണ്. ഗഹനമായ പഠനം, വായന, അനലറ്റിക്കൽ സ്കിൽ എന്നിവ അത്യാവശ്യമാണ്. കുട്ടികൾക്ക് ഗുണകരമാകണമെങ്കിൽ പഠന രീതിയിലും കാര്യമായ മാറ്റങ്ങൾ വേണം. നല്ല തയ്യാറെടുപ്പും സമഗ്രമായ വായനയും വേണം. ഓപ്പൺബുക്ക് സംബന്ധിച്ച് അദ്ധ്യാപകർക്കും സംശയങ്ങൾ ഏറെയാണ്.
ഡോ.ടി.പി.സേതുമാധവൻ
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |