തിരുവനന്തപുരം: വിദേശസഹായ നിയന്ത്രണ ചട്ടം ലംഘിച്ച കേസിൽ കുരുങ്ങിയ വടക്കാഞ്ചേരി ലൈഫ് മിഷൻ ഫ്ലാറ്റ് സമുച്ചയത്തിന് ബലക്ഷയമില്ലെന്ന് വിദഗ്ദ്ധസമിതി. സർക്കാർ നിയോഗിച്ച തൃശൂർ എൻജിനിയറിംഗ് കോളേജിലെ വിദഗ്ദ്ധർ, ക്വാളി​റ്റി കൺട്രോളർ (എറണാകുളം), പി.ഡബ്ല്യു.ഡി ബിൽഡിംഗ് എക്സിക്യൂട്ടിവ് എൻജിനിയർ (തൃശൂർ) എന്നിവരടങ്ങിയ സമിതി വിജിലൻസിനു റിപ്പോർട്ട് കൈമാറി. ഫ്ലാറ്റ് നിർമ്മിച്ചത് ചരിവുള്ള ഭൂമിയിലാണെന്നും ഫ്ലാറ്രിനു ചുറ്റും ഫയർഫോഴ്സ് വാഹനം പോകാൻ സ്ഥലമില്ലെന്നുമൊക്കെ ആരോപണം ഉയർന്നിരുന്നു.

തൂണുകളുടെ ബലം പരിശോധിക്കുന്ന ഹാമർ ടെസ്​റ്റ്, കോൺക്രീറ്റ് മുറിച്ചെടുത്ത് പരിശോധിക്കുന്ന കോർ ടെസ്​റ്റ് തുടങ്ങിയവ നടത്തി. തൃശൂർ എൻജിനിയറിംഗ് കോളേജിലായിരുന്നു കോൺക്രീ​റ്റ് പരിശോധന. യു.എ.ഇ കോൺസുലേ​റ്റ് വഴി റെഡ് ക്രസന്റ് അനുവദിച്ച 18.50 കോടി രൂപയിൽ 14.50 കോടി രൂപ ചെലവാക്കി 140 ഫ്ളാ​റ്റുകൾ നിർമ്മിക്കാനാണ് പദ്ധതി തയാറാക്കിയത്. ശേഷിക്കുന്ന തുക ഉപയോഗിച്ച് ആരോഗ്യകേന്ദ്രം നിർമ്മിക്കുമെന്നാണു കരാർ. ഫ്ലാറ്ര് നിർമ്മാണ കരാർ ലഭിക്കാൻ 4.48 കോടി രൂപ കൈക്കൂലി നൽകിയെന്നു യൂണിടാക് എം.ഡി സന്തോഷ് ഈപ്പൻ മൊഴിനൽകിയിരുന്നു. വിജിലൻസിനു പുറമെ സി.ബി.ഐയും ലൈഫ് അഴിമതി അന്വേഷിക്കുന്നുണ്ട്.