തിരുവനന്തപുരം: സംസ്ഥാനത്ത് കൊവിഡ് മരണം തെളിയിക്കുന്ന ഡെത്ത് ഡിക്ലറേഷൻ സർട്ടിഫിക്കറ്റിനായി അപ്പീൽ നൽകുമ്പോഴുണ്ടാകുന്ന സംശയങ്ങൾ അകറ്റാൻ ദിശ ഹെൽപ് ലൈൻ സജ്ജമാക്കിയതായി മന്ത്രി വീണാജോർജ് അറിയിച്ചു. 104,1056, 0471 2552056,2551056 എന്നീ നമ്പരുകളിൽ ബന്ധപ്പെട്ടാൽ മാർഗനിർദ്ദേശം ലഭിക്കും. 24 മണിക്കൂറും ദിശയുടെ സേവനം ലഭ്യമാണ്.

ഇഹെൽത്ത് കൊവിഡ് ഡെത്ത് ഇൻഫോപോർട്ടൽ (https://covid19.kerala.gov.in/deathinfo) മുഖേനയാണ് അപേക്ഷകൾ സമർപ്പിക്കേണ്ടത്. ഐ.സി.എം.ആർ പുറത്തിറക്കിയ പുതുക്കിയ മാർഗനിർദ്ദേശ പ്രകാരം കൊവിഡ് മരണമായി കണക്കാക്കാവുന്നതും സംസ്ഥാന സർക്കാർ പ്രസിദ്ധീകരിച്ച കൊവിഡ് മരണലിസ്റ്റിൽ ഇല്ലാത്തതും, ഏതെങ്കിലും പരാതിയുള്ളവർക്കും പുതിയ സംവിധാനം വഴി അപ്പീൽ നൽകാനാകും.

ഓൺലൈനായി അപേക്ഷ സമർപ്പിക്കാൻ അറിയാത്തവർക്ക് പി.എച്ച്.സി വഴിയോ അക്ഷയസെന്റർ വഴിയോ ഓൺലൈനായി അപേക്ഷിക്കാം. ഇതിനുള്ള അപേക്ഷാഫോം കൊവിഡ് 19 ഡെത്ത് ഇൻഫോ പോർട്ടലിൽ നിന്ന് ഡൗൺലോഡ് ചെയ്യാമെന്നും മന്ത്രി കൂട്ടിച്ചേർത്തു.