തിരുവനന്തപുരം: പി.എസ്.സിയുടെ അഡ്വൈസ് മെമ്മോ ലഭിച്ചവർക്കെല്ലാം ജോലി നൽകുമെന്ന് മുഖ്യമന്ത്രി പിണറായി വിജയൻ പറഞ്ഞു. കൊവിഡ് പശ്ചാത്തലത്തിലെ നിയന്ത്രണങ്ങൾ തടസ്സമാകില്ല. സ്‌കൂൾ തുറക്കാത്തതുകൊണ്ട് അദ്ധ്യാപകർക്ക് നിയമനം നഷ്ടമാകില്ല.

ഐ.സി.എം.ആറിന്റെ നിർദ്ദേശ പ്രകാരമാണ് സംസ്ഥാനത്ത് കൊവിഡ് മരണങ്ങൾ കണക്കിൽ പെടുത്തുന്നത്. മരണനിരക്ക് കൂടിയത് രോഗവ്യാപന നിരക്ക് വർദ്ധിച്ചതുകൊണ്ടാണ്. മരണം രേഖപ്പെടുത്തുന്നത് ഡോക്ടർമാരാണ്. അതിൽ വീഴ്ച സംഭവിച്ചിട്ടില്ല. ബി.എസ് സി നഴ്‌സിംഗ് വിദ്യാർത്ഥികളുടെ പരീക്ഷ നടത്തുന്നത് പരിഗണിക്കും. ജില്ല വിട്ടുള്ള യാത്രകൾക്ക് നിയന്ത്രണങ്ങൾ തുടരും. പുഷ്പവ്യാപാരം അനുവദിക്കുന്നത് പരിഗണിക്കും. നിർമ്മാണമേഖലയിലെ അനിയന്ത്രിത വിലക്കയറ്റത്തിനെതിരെ നടപടി സ്വീകരിക്കും. മലപ്പുറം ജില്ലയിൽ സമൂഹഅടുക്കളകളും ജനകീയ ഹോട്ടലുകളും തുടങ്ങാൻ നിർദ്ദേശം നൽകിയതായും മുഖ്യമന്ത്രി പറഞ്ഞു.