ബംഗളൂരു: മാസപ്പടി കേസിൽ സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്.എഫ്.ഐ.ഒ.) നടത്തുന്ന അന്വേഷണം സ്റ്റേ ചെയ്യണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന്റെ മകൾ വീണയുടെ കമ്പനിയായ എക്സാലോജിക് കർണാടക ഹൈക്കോടതിയിൽ ഇന്നലെ ഹർജി നൽകി.. ഹർജി ഇന്ന് പരിഗണിച്ചേക്കും.
വീണയിൽ നിന്ന് എസ്.എഫ്.ഐ.ഒ. വിവരങ്ങൾ തേടുമെന്ന സൂചനകൾക്കിടെയാണ് ഹർജി നൽകിയത് . എസ്.എഫ്.ഐ.ഒ. ഡയറക്ടറെയും കേന്ദ്രസർക്കാരിനെയും എതിർകക്ഷികളാക്കിയാണ് എക്സാലോജിക് സൊലൂഷൻസ് ഡയറക്ടർ വീണ വിജയൻ കോടതിയിലെത്തിയത്. ബംഗളൂരു ആസ്ഥാനമായി പ്രവർത്തിക്കുന്ന ഐ.ടി. കമ്പനി ആയതിനാലാണ് കർണാടക ഹൈക്കോടതിയെ സമീപിച്ചത്.
കേരള സർക്കാർ സ്ഥാപനമായ കെ.എസ്.ഐ.ഡി.സിയും എസ്.എഫ്.ഐ.ഒ. അന്വേഷണത്തിനെതിരെ കേരള ഹൈക്കോടതിയെ സമീപിച്ചിരുന്നു. ബുധനാഴ്ച കേസിൽ വാദം കേട്ടെങ്കിലും അന്വേഷണം സ്റ്റേ ചെയ്യണമെന്ന ആവശ്യം ഹൈക്കോടതി നിരസിച്ചിരുന്നു.
ഏത് കേസ് വന്നാലും
മുഖ്യമന്ത്രി കുലുങ്ങില്ല: എ.കെ.ബാലൻ
പാലക്കാട്: എക്സാലോജിക്കിന് എതിരെ നടക്കുന്ന എസ്.എഫ്.ഐ.ഒ അന്വേഷണം സ്റ്റേ ചെയ്യണമെന്നാവശ്യപ്പെട്ട് മുഖ്യമന്ത്രി പിണറായി വിജയന്റെ മകൾ വീണ ഹർജി നൽകിയത് സ്വാഭാവികമായ നിയമ നടപടിയാണ്. കോടതിയുടെ മുന്നിലുള്ള കേസിലാണ് എസ്.എഫ്.ഐ.ഒ അന്വേഷണം. അതിൽ തീരുമാനം വരും മുമ്പ് എസ്.എഫ്.ഐ.ഒ അന്വേഷണം നടക്കുന്നതിനാലാണ് ഹർജി നൽകിയത്. അന്വേഷണ ഏജൻസിയെ ആരും ഭയക്കുന്നില്ല. അന്വേഷണം പാടില്ലെന്നും ആരും പറഞ്ഞിട്ടില്ല. ഇതിനേക്കാൾ അപ്പുറമുള്ള കേസ് വന്നാൽ പോലും മുഖ്യമന്ത്രിയെയോ സർക്കാരിനെയോ ബാധിക്കില്ല. വെളുക്കാൻ തേച്ചത് പാണ്ടായത് പോലെ യു.ഡി.എഫിലേക്കായിരിക്കും കാര്യങ്ങൾ നീങ്ങുകയെന്നും ബാലൻ പറഞ്ഞു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |