തിരുവനന്തപുരം: ചരക്ക്‌ സേവന നികുതി റിട്ടേൺ കുടിശികയുള്ള വ്യാപാരികളുടെ ഇ-വേ ബിൽ സൗകര്യം തടയുന്നത് ആഗസ്റ്റ് 15ന് പുനരാരംഭിക്കും. ജി.എസ്.ടി.ആർ 3 ബി, ജി.എസ്.ടി സി.എം.പി 08 എന്നീ റിട്ടേണുകളിൽ രണ്ടോ അതിൽ കൂടുതലോ റിട്ടേൺ കുടിശികയുള്ള വ്യാപാരികളുടെ ഇ-വേ ബിൽ സൗകര്യമാണ് തടസപെടുന്നത്. 2021 ജൂൺ മാസം വരെ രണ്ടോ അതിൽ കൂടുതലോ ജി.എസ്.ടി.ആർ 3 ബി റിട്ടേണുകൾ കുടിശികയുള്ള വ്യാപാരികൾക്കും, ത്രൈമാസം ഏപ്രിൽ മുതൽ ജൂൺ 2021 വരെ കോമ്പോസിഷൻ നികുതി ദായകർ ഫയൽ ചെയ്യേണ്ട സ്റ്റേറ്റ്‌മെന്റ്‌ ഫോം ജി.എസ്. ടി സി.എം.പി 08ൽ രണ്ടോ അതിൽ കൂടുതലോ കുടിശികയുള്ള വ്യാപാരികളുടെയും ഇവേ ബിൽ 15 മുതൽ തടസപ്പെടും. ഇ-വേ ബിൽ സംവിധാനം തടസമില്ലാതെ തുടർന്നും ലഭിക്കാൻ വ്യാപാരികൾ കുടിശികയുള്ള ജി.എസ്.ടി.ആർ 3 ബി, ജി.എസ്.ടി സി.എം.പി 08 എന്നീ റിട്ടേണുകൾ ഉടൻ തന്നെ ഫയൽ ചെയ്യണമെന്ന് നികുതി വകുപ്പ് കമ്മിഷണർ അറിയിച്ചു.