തിരുവനന്തപുരം: വെള്ളക്കരം പ്രതിവർഷം അഞ്ച് ശതമാനം വർദ്ധിപ്പിക്കണമെന്ന കേന്ദ്ര നിർദ്ദേശം ഇത്തവണ നടപ്പാക്കാനാവില്ലെന്ന് കേരളം അറിയിക്കും. വെള്ളക്കരം കിലോലിറ്ററിന് (1000 ലിറ്റർ)​ 10 രൂപ അടുത്തിടെ കൂട്ടിയ സാഹചര്യത്തിൽ ഇരട്ടി പ്രഹരമാവുമെന്ന് കണ്ടാണ് നീക്കം.

സംസ്ഥാനത്തിന്റെ കടമെടുപ്പ് പരിധി രണ്ടുശതമാനം വർദ്ധിപ്പിക്കുന്നതിന്റെ ഭാഗമായി കേന്ദ്രം നിർദ്ദേശിച്ചതനുസരിച്ച് 2021ലും 22ലും വെള്ളക്കരം 5 ശതമാനം വർദ്ധിപ്പിച്ചിരുന്നു. കേന്ദ്ര നിർദ്ദേശമായതിനാൽ സംസ്ഥാനത്തിന് സ്വന്തം നിലയിൽ തീരുമാനമെടുക്കാനാവില്ല. സാഹചര്യം വിവരിച്ച് കേന്ദ്രത്തിന് കത്തെഴുതാനാണ് തീരുമാനം.

കേന്ദ്രം നിർദ്ദേശിച്ച വർദ്ധന ഏപ്രിൽ ഒന്നിന് നടപ്പാക്കേണ്ടതാണെന്ന് ജലവിഭവ മന്ത്രി റോഷി അഗസ്റ്റിന് വാട്ടർ അതോറിട്ടി ഇന്നലെ റിപ്പോർട്ട് നൽകിയിരുന്നു. എന്നാൽ,​ 5 ശതമാനം വർദ്ധന ഉടൻ നടപ്പാക്കേണ്ടെന്നും സാഹചര്യം കേന്ദ്രത്തെ അറിയിക്കാനുമായിരുന്നു നി‌ർദ്ദേശം.

അതേസമയം,​ കഴിഞ്ഞ തിങ്കളാഴ്ച നിയമസഭയിൽ നൽകിയ മറുപടിയിൽ വർഷംതോറുമുള്ള 5% ചാർജ് വർദ്ധന പിൻവലിക്കാൻ കഴിയില്ലെന്നായിരുന്നു മന്ത്രിയുടെ മറുപടി.

'കേന്ദ്ര ധനകാര്യ വകുപ്പിനെയും ആർ.ബി.ഐയേയും ഇക്കാര്യം ധരിപ്പിക്കും. ഇതിലൂടെ ജനങ്ങൾക്ക് ഇനിയും നിരക്ക് വർദ്ധനവിന്റെ ഭാരം ഒഴിവാകും.'

റോഷി അഗസ്റ്റിൻ

മന്ത്രി