ന്യൂഡൽഹി: അസംസ്കൃതവസ്‌തുക്കളുടെ വിലക്കയറ്റം മൂലം ഉത്‌പാദനച്ചെലവേറിയ പശ്ചാത്തലത്തിൽ വിവിധ മോഡലുകൾക്ക് 1.9 ശതമാനം വരെവില വർദ്ധിപ്പിച്ച് മാരുതി സുസുക്കി. പുതുക്കിയ വില പ്രാബല്യത്തിൽ വന്നു. സെലെറിയോ ഒഴികെയുള്ള മോഡലുകൾക്കാണ് വിലവർദ്ധന.

ഈ വർഷം ഇതു മൂന്നാംവട്ടമാണ് മാരുതി വില കൂട്ടുന്നത്. ജനുവരി, ഏപ്രിൽ മാസങ്ങളിലും വില കൂട്ടിയിരുന്നു. ഇതോടെ, മൊത്തം വിലവർദ്ധന 3.5 ശതമാനമായി. 2.99 ലക്ഷം രൂപയുടെ ഓൾട്ടോ മുതൽ 12.39 ലക്ഷം രൂപയുടെ എസ്-ക്രോസ് വരെയുള്ള മോഡലുകളാണ് മാരുതിക്കുള്ളത്. ചിപ്പ് ക്ഷാമം മൂലം ഈമാസം ഉത്‌പാദനം വെട്ടിക്കുറയ്ക്കുമെന്നും മാരുതി വ്യക്തമാക്കിയിരുന്നു.