വാഷിംഗ്ടൺ: ക്രിപ്റ്റോകറൻസികളെ പരിഹസിക്കാനായി രംഗത്തു വന്ന ക്രിപ്റ്റോ നാണയമാണ് ഡോഗ്കോയിൻ. ഡോഷ്കോയിനെന്നാണ് ഈ വാക്കിന്റെ യഥാർത്ഥ ഉച്ചാരണം. 2013ൽ ബില്ലി മാർക്കസ്, ജാക്സൻ പാർമർ എന്നിവർ ചേർന്ന് പുറത്തിറക്കിയ ഈ നാണയത്തിൽ മുഖചിത്രമായി ഉൾപ്പെടുത്തിയിരിക്കുന്നത് മുഖമൽപം ചരിച്ച് കുസൃതിക്കണ്ണുകളുമായി നാണത്തോടെ നോക്കിയിരിക്കുന്ന ഒരു സുന്ദരി നായക്കുട്ടിയെയാണ്.ട്രോളുകളിലും സ്റ്റിക്കറുകളിലും നേരത്തെ തന്നെ നിറഞ്ഞു നിന്നിരുന്ന ഈനായ്ക്കുട്ടി ഡോഗ്കോയ്ന്റെ മുഖചിത്രമാതോടെ സൂപ്പർതാരമായി. അമേരിക്കൻ തിരഞ്ഞെടുപ്പിൽ വരെ ഈ നായ്ക്കുട്ടി പ്രചരണായുധമായി.

അത് ഞാനാണേ....

ഷിബ്ന ഇനു എന്ന ബ്രീഡിൽ പെട്ട ഈ നായയുടെ പേര് കബോസു എന്നാണ്. ജപ്പാനിലെ ഒരു പ്രൈമറി സ്കൂൾ ടീച്ചറായ അറ്റ്സുകോ സാറ്റോ എന്ന വനിതയുടെ പ്രിയപ്പെട്ട നായ്ക്കുട്ടിയാണ് കബോസു. ഓറഞ്ചും നാരങ്ങയുമൊക്കെ അടങ്ങിയ ‘സിട്രസ്’ കുടുംബത്തിൽ പെട്ട ഒരു ഫലവർഗമാണു കബോസോ. നായയുടെ മുഖം ഈ പഴത്തെ അനുസ്മരിപ്പിക്കുന്നത് കൊണ്ടാണു കബോസോയെന്നു പേരു നൽകിയതെന്ന് സാറ്റോ പറയുന്നു. 2010 ഫെബ്രുവരിയിൽ കബോസുവിന്റെ ചിത്രങ്ങളും വിശേഷങ്ങളും പങ്കുവയ്ക്കുന്നതിനായി സാറ്റോ ഒരു ബ്ലോഗ് തുടങ്ങി. ഈ ബ്ലോഗിലൂടെ കബോസു ലോകപ്രശസ്തയായി. എന്നാൽ,ഇതൊന്നും സാറ്റോ അറിഞ്ഞിരുന്നില്ല. പിന്നീട് വിവരമറിഞ്ഞപ്പോൾ സാറ്റോ ഞെട്ടുകയും ചെയ്തു. ഡോഗ്കോയിന്റെ മുഖചിത്രമായതോടെ ഇത്തിരി ഗമയിലാണ് 15കാരിയായ കബോസുവിന്റെ നടപ്പെന്ന് തമാശയായി സാറ്റോ പറയുന്നു.