ചേർത്തല: പരസഹായമില്ലാതെ ജീവിക്കാൻ കഷ്ടപ്പെടുന്ന ദീപുവിന് സഹായ ഹസ്തവുമായി സംസ്ഥാന ഭിന്നശേഷി കമ്മിഷണർ എസ്.എച്ച്. പഞ്ചാപകേശനും ഡിഫറന്റ്‌ലി ഏബിൾഡ് എംപ്ലോയീസ് അസോസിയേഷൻ സംസ്ഥാന കമ്മി​റ്റിയും. സെറിബ്രൽ പൾസറി ബാധിച്ച് അവശനിലയിലായ ദീപു കു​റ്റിക്കാട്ട് ആമ്പശേരി വീട്ടിൽ വാടകയ്ക്ക് താമസിക്കുകയാണ്. ലോട്ടറി വില്പനക്കാരനായിരുന്നു. ജോലിചെയ്യാൻ കഴിയാതെ വന്നതോടെ വാടകപോലും നൽകാൻ കഴിയാത്ത സ്ഥിതിയായി. സുഹൃത്തുക്കളാണ് ദിവസേന സഹായിച്ചിരുന്നത്.
നിസഹയാവസ്ഥ ശ്രദ്ധയിൽപ്പെട്ട ഡിഫറന്റലി ഏബിൾഡ് എംപ്ലോയീസ് അസോസിയേഷൻ (ഡി.എ.ഇ.എ) സംസ്ഥാനതല എക്‌സ്‌പോർട്ടിംഗ് കമ്മി​റ്റി ചയർപേഴ്‌സണായ പണ്ടുസിന്ധു വിഷയത്തിൽ ഇടപെട്ടു. ഭിന്നശേഷിക്കാരിയായ ഇവർ പ്രത്യേകമായി ഒരുക്കിയ വാഹനത്തിൽ വീൽചെയറിലെത്തിയാണ് ദീപുവിനെ സന്ദർശിച്ചത്. പഞ്ചായത്ത് വകുപ്പിൽ പെർഫോമൻസ് ഓഡി​റ്റ് സൂപ്പർവൈസറാണ് പണ്ടുസിന്ധു.
ഇരിങ്ങാലക്കുട സ്വദേശിയുടെ സഹകരണത്തിൽ കട്ടിലും ഫ്ലോട്ടഡ് ബഡിനും വഴിയൊരുക്കി. തകരാറിലായ മുച്ചക്രവാഹനം അ​റ്റകു​റ്റപ്പണി നടത്തുന്നതിനുള്ള തുകയും വീടിന്റെ വാടകയ്ക്കുള്ള തുകയും നൽകി. കമ്മിഷണർ സഹായങ്ങൾ കൈമാറി.
ദീപുവിന്റെ തുടർചികിത്സയ്ക്കും സംരക്ഷണത്തിനും വേണ്ട നടപടികളും കമ്മിഷണർ ഉറപ്പുവരുത്തി. ജില്ലയിലെ ഡി.എ.ഇ.എ അംഗങ്ങളായ സാബുജൻ, രാജേന്ദ്രൻ, സന്തോഷ് എന്നിവരും വർഗീസ് തെക്കേത്തല, ജോസഫ് ചെമ്പകശേരി എന്നിവരും എത്തിയിരുന്നു.