അമ്പലപ്പുഴ: ഒക്ടോബർ 2ന് അമ്പലപ്പുഴ തെക്ക് - വടക്ക് പഞ്ചായത്തുകളിലെ 13 സ്കൂളുകളിലെ 3000ൽ അധികം കുട്ടികൾ ശാസ്ത്രപ്പട്ടം പറത്തും. കുട്ടികളിൽ കൊവിഡ് സമ്മർദ്ദം കുറച്ച് മാനസികോല്ലാസം പകരാനാണ് പരിപാടി. വൈകിട്ട് 3ന് തിരുവനന്തപുരം കേരള ശാസ്ത്ര സാങ്കേതിക മ്യൂസിയം പ്രിയദർശിനി പ്ലാനിറ്റോറിയം ഡയറക്ടർ ഡോ. പി. ജി. പത്മകുമാർ പ്ലാനിറ്റോറിയം ഗ്രൗണ്ടിൽ പട്ടം പറത്തി ഓൺലൈനിൽ ഉദ്ഘാടനം നിർവഹിക്കും. തുടർന്ന് അമ്പലപ്പുഴയുടെ വിവിധ ഭാഗങ്ങളിൽ നിന്ന് അഞ്ചോ ആറോ കുട്ടികളടങ്ങുന്ന ചെറുസംഘങ്ങൾ ശാസ്ത്രജ്ഞരുടെ പേരും ഫോട്ടോയും കണ്ടുപിടിത്തങ്ങളും രേഖപ്പെടുത്തി അവർ തന്നെ നിർമ്മിച്ച വർണപ്പട്ടങ്ങൾ പറത്തും. ശാസ്ത്ര സാഹിത്യ പരിഷത്ത് സംഘടിപ്പിച്ച രക്ഷാകർത്തൃ ശാക്തീകരണ പരിപാടിയായ 'മക്കൾക്കൊപ്പം ക്യാമ്പയിന്റെ തുടർച്ചയായാണ് കുട്ടികൾക്കായി ശാസ്ത്രപ്പട്ടം പറപ്പിക്കൽ സംഘടിപ്പിച്ചിരിക്കുന്നത്.