ആലപ്പുഴ: സക്കറി​യാ ബസാർ ജംഗ്ഷന് തെക്ക് വശത്തുള്ള ട്രാൻസ്ഫോർമറിൽ നിന്ന് 11 കെ.വി ലൈൻ കത്തി താഴെ വീണു. ഞായറാഴ്ച് രാത്രി 12 മണിയോടെയായിരുന്നു സംഭവം. ഉടൻ തന്നെ കെ.എസ്.ഇ.ബി സൗത്ത് സെക്ഷൻ അധികൃതർ ഇടപെട്ട് വൈദ്യുതി ബന്ധം വിച്ഛേദിച്ചു. രാവിലെ 10 മണിയായിട്ടും കേബിൾ ജനങ്ങളുടെ ദേഹത്ത് മുട്ടുന്ന തരത്തിൽ താഴ്ന്നു തന്നെ കിടക്കുകയായിരുന്നെന്ന് പ്രദേശവാസികൾ പരാതിപ്പെട്ടു. വീടുകളിൽ നിന്നും വ്യാപാര സ്ഥാപനങ്ങളിൽ നിന്നും പുറത്തിറങ്ങുന്നവരുടെ ദേഹത്ത് മുട്ടുന്ന രീതിയിലായിരുന്നു കേബിൾ. ഞായർ രാത്രിയിലെ കനത്ത മഴയും, ആവശ്യത്തിന് ജീവനക്കാരുടെ അഭാവവും മൂലമാണ് കേബിൾ മാറ്റുന്ന ജോലി പിറ്റേ ദിവസത്തേക്ക് മാറ്റിയതെന്ന് കെ.എസ്.ഇ.ബി​ അധികൃതർ പറഞ്ഞു. ഇന്നലെ രാവിലെ കേബിൾ മാറ്റി സ്ഥാപിച്ച ശേഷം വൈദ്യുതി വി​തരണംപുനരാരംഭിച്ചു.