കണ്ണൂർ: സ്വകാര്യ ട്യൂഷൻ സെന്ററിൽ ക്ലാസെടുത്ത വിഷയത്തിൽ കണ്ണൂർ സർവ്വകലാശാല സിൻഡിക്കേറ്റ് അംഗത്തിനെതിരായ നടപടി മരവിപ്പിച്ചു. കണ്ണൂർ സിൻഡിക്കേറ്റ് അംഗമായ തലശ്ശേരിയിലെ അദ്ധ്യാപകന്റെ പ്രൈവറ്റ് ട്യൂഷൻ സംബന്ധിച്ച പരാതിയിൽ കൈകൊണ്ട ശിക്ഷാനടപടിയാണ്​ മരവിപ്പിച്ചത്​. സ്വകാര്യ ട്യൂഷൻ സ്ഥാപനനടത്തിപ്പിൽ പങ്കാളിയായതിന്റെ പേരിൽ ഇദ്ദേഹത്തിനെതിരെ അച്ചടക്ക നടപടി കൈക്കൊള്ളണമെന്ന്​ സംസ്ഥാന വിജിലൻസ് ഡയറക്​ടറുടെ അന്വേഷണ റിപ്പോർട്ടുണ്ടായിരുന്നു.

നിലവിൽ തലശ്ശേരിയിൽ ജോലിചെയ്യുന്ന അദ്ധ്യാപകനെ കണ്ണൂർ ജില്ലയിൽ നിന്നും ഉടനടി സ്ഥലംമാറ്റാനായിരുന്നു വിജിലൻസ് ശിപാർശ. ഇത് രാഷ്ട്രീയ സമ്മർദ്ദത്തെ തുടർന്ന് മരവിപ്പിച്ചതായാണ്​ ആക്ഷേപം. വിജിലൻസ് ഡയറക്​ടറുടെ അന്വേഷണ റിപ്പോർട്ടി​ന്റെ അടിസ്ഥാനത്തിലാണ് ബ്രണ്ണൻ കോളജിലെ രണ്ട് അദ്ധ്യാപകർക്കെതിരെയും കണ്ണൂർ കൃഷ്​ണമേനോൻ വനിത കോളേജിലെ ഒരു അദ്ധ്യാപികക്കെതിരെയും സർക്കാർ നടപടി കൈക്കൊണ്ടത്. ശിക്ഷനടപടിയുടെ ഭാഗമായി രണ്ട് അദ്ധ്യാപകരെ കണ്ണൂരിന് പുറത്തുള്ള ജില്ലയിലേക്ക് സ്ഥലംമാറ്റിയിരുന്നു. എന്നാൽ ഇദ്ദേഹത്തിനെതിരെയുള്ള നടപടി പിന്നീട്​ സർക്കാർ മരവിപ്പിക്കുകയായിരുന്നു. സർക്കാർ ഉത്തരവ് പുറപ്പെടുവിച്ചിട്ട് ആറുമാസം പിന്നിട്ടിട്ടും ഉന്നത സ്വാധീനത്തിലാണ് ശിക്ഷാനടപടി മരവിച്ചതെന്ന് ആരോപണമുണ്ട്. പയ്യന്നൂരിലുള്ള ഒരു സ്വകാര്യ ട്യൂഷൻ സ്ഥാപനവുമായി ബന്ധപ്പെട്ട് ഈ അദ്ധ്യാപകർ പ്രവർത്തിക്കുന്നതായാണ് വിജിലൻസ് കണ്ടെത്തിയിരുന്നത്.

നിലപാടിൽ നിന്നുള്ള പിൻമാറ്റം

സർവീസ് ചട്ടങ്ങൾ പരസ്യമായി ലംഘിച്ച് സ്വകാര്യ വിദ്യാഭ്യാസ സ്ഥാപനങ്ങളിൽ സർക്കാർ കോളേജ് അദ്ധ്യാപകർ ട്യൂഷനെടുക്കുന്നത് ശ്രദ്ധയിൽപെട്ടതിനെ തുടർന്ന് പ്രൈവറ്റ് ട്യൂഷൻ കർശനമായി നിയന്ത്രിക്കുന്നതിന് ഒരൂ വിജിലൻസ് സെൽ രൂപവത്​കരിക്കാൻ സർക്കാർ ഉത്തരവ് നിലവിലിരിക്കെയാണ് പ്രഖ്യാപിച്ച ശിക്ഷ നടപ്പാക്കാതെ ഉരുണ്ടുകളിക്കുന്നത്..

അദ്ധ്യാപകനെതിരെ മാതൃകപരമായ ശിക്ഷാ നടപടികൾ കൈകൊള്ളണം . സർക്കാർ ഉത്തരവ് പുറപ്പെടുവിച്ചിട്ട് ആറുമാസം പിന്നിട്ടിട്ടും ഉന്നത സ്വാധീനത്തിലാണ് ശിക്ഷാനടപടി മരവിച്ചത്-സേവ് യൂണിവേഴ്​സിറ്റി കാമ്പയിൻ കമ്മിറ്റി