പഴയങ്ങാടി:മാടായി തിരുവർക്കാട്ട് കാവിൽ ക്ഷേത്ര നവീകരണ സമിതിയുടെ നേതൃത്വത്തിൽ നടന്ന രാമായണ മാസാചരണത്തിന് സമാപനമായി. ദിവസവും രാവിലെയും വൈകീട്ടും രാമായണ പാരായണം അദ്ധ്യാത്മിക പ്രഭാഷണം , രാമായണ പാരായണ മത്സരം എന്നിവയും നടന്നിരുന്നു. സമാപന ദിവസം എൽ.പി,യു.പി, ഹൈസ്കൂൾ , പൊതു വിഭാഗം എന്നിവർക്കായി രാമായണ പ്രശ്നോത്തരിയും നടന്നു. സമാപന പരിപാടി ഫോക് ലോർ അക്കാഡമി മുൻ ചെയർമാനും എഴുത്തുകാരനുമായ പ്രൊഫ ബി.മുഹമ്മദ് അഹമ്മദ് ഉദ്ഘാടനം ചെയ്തു. വിവിധ മത്സരങ്ങളിൽ വിജയിച്ചവർക്കുള്ള ഉപഹാരങ്ങളും നൽകി. ക്ഷേത്ര നവീകരണ സമിതി പ്രസിഡന്റ് അഡ്വ: ടി.വി.ഹരീന്ദ്രൻ അദ്ധ്യക്ഷത വഹിച്ചു. നവീകരണ സമിതി ജനറൽ സെക്രട്ടറി കെ.വി.എൻ.ബൈജു , ക്ഷേത്ര കലാ അക്കാഡമി സെക്രട്ടറി കൃഷ്ണൻ നടുവലത്ത്, എം.പി.ചന്തു വെങ്ങര, കെ.സജീവൻ , എ.രാകേഷ് തുടങ്ങിയവർ സംസാരിച്ചു.