 സർവ്വേ നടപടികൾ പുരോഗമിക്കുന്നു

കൊല്ലം: കേന്ദ്ര സർക്കാർ പ്രഖ്യാപിച്ച കൊല്ലം - മധുര സാമ്പത്തിക ഇടനാഴി (എക്കണോമിക് കോറിഡോർ) യാഥാർത്ഥ്യമായാൽ കൊല്ലത്തിന്റെ വികസനം പുതുവഴികളിലെത്തും. സർവ്വേ നടപടികൾ പുരോഗമിക്കുകയാണ്.

തുറമുഖ നഗരമായ കൊല്ലത്തെയും തമിഴ്നാട്ടിലെ പ്രധാനപ്പെട്ട വ്യവസായ നഗരങ്ങളിൽ ഒന്നായ മധുരയെയും ബന്ധിപ്പിക്കുന്ന ഈ പാത യാഥാർത്ഥ്യമാകുന്നതോടെ കൊല്ലം, മധുര ജില്ലകൾ തമ്മിലുള്ള അകലം കുറയും. പാരിപ്പള്ളി കടമ്പാട്ടുകോണത്ത് നിന്നു തുടങ്ങി കൊല്ലം ചടയമംഗലത്തെയും അഞ്ചലിനെയും കുളത്തൂപ്പുഴയെയും ആര്യങ്കാവിനെയും ബന്ധപ്പെടുത്തി തമിഴ്നാട്ടിലെ ചെങ്കോട്ടയിൽ ചേരുന്ന ഇടനാഴി, അവിടെനിന്നു മധുരയുമായി ബന്ധപ്പെടുന്നു. നിലവിലെ കൊല്ലം - തിരുമംഗലം ദേശീയ പാതയ്ക്ക് (എൻ.എച്ച്- 744) സമാന്തരമായി നിർമ്മിക്കുന്ന പുതിയ പാതയായതിനാൽ കടന്നുപോകുന്ന ചെറിയ ജംഗ്ഷനുകൾ ഉൾപ്പെടെയുള്ള പ്രദേശങ്ങൾക്ക് ഉണ്ടാകാൻ പോകുന്ന മാറ്റം വലുതായിരിക്കും. നിലവിലുളള ദേശീയപാത വികസിപ്പിക്കാൻ ഭൂമി ലഭ്യമല്ലാത്ത സാഹചര്യത്തിലാണ് പുതിയ പാതയ്ക്ക് നിർദേശം ഉയർന്നത്.

പാത യാഥാർത്ഥ്യമായാൽ

 പരിസ്ഥിതി സൗഹൃദ വ്യവസായ നിക്ഷേപങ്ങൾ കൂടുതലുണ്ടാകും, തൊഴിൽ സാദ്ധ്യത വർദ്ധിക്കും

 ജില്ലയെ തമിഴ്നാടുമായി കണക്ട് ചെയ്യുന്ന വളരെ വേഗമേറിയ പാത

 നിലവിൽ കൊല്ലത്തു നിന്നു മധുര വരെ പോകുന്ന ദൂരവും സമയവും കുറയും

 ജില്ലയുടെ തെക്ക് ഭാഗങ്ങളിലുള്ളവർക്ക് മധുര, തിരുനൽവേലി, തൂത്തുക്കുടി രാമേശ്വരം, തിരുച്ചിറപ്പള്ളി സ്ഥലങ്ങളിലേക്ക് വേഗമെത്താം

 ജഡായു പാറ സ്ഥിതിചെയ്യുന്ന ചടയമംഗലം ഉൾപ്പെടെയുള്ള സ്ഥലങ്ങളിലേക്ക് തമിഴ്നാട്ടിൽ നിന്ന് സഞ്ചാരികൾക്ക് വേഗമെത്താം

 കിഴക്കൻ മേഖലയിലെ ടൂറിസം കേന്ദ്രങ്ങൾക്ക് കൂടുതൽ വളരാനാവും

 ചെങ്കോട്ടയിൽ നിന്നു തിരുനെൽവേലി റോഡിലൂടെ തിരുനെൽവേലി ജില്ലയുമായും തൂത്തുക്കുടി - കൊല്ലം തുറമുഖവുമായും ബന്ധം

 കൊല്ലം തുറമുഖത്ത് ഇറക്കുന്ന കണ്ടെയ്നറുകൾ മധുരയ്ക്കും സമീപ ജില്ലകളിലേക്കും വേഗം എത്തിക്കാം

 മധുരയിൽ നിന്നുള്ള ചരക്കുകൾ റോഡ് മാർഗം വേഗം ജില്ലയുടെ തെക്കൻ മേഖലകളിലെത്തിക്കാം

 പാത ആരംഭിക്കുന്ന പാരിപ്പള്ളി, പാത കടന്നുപോകുന്ന ചടയമംഗലം, അഞ്ചൽ തുടങ്ങിയ ടൗണുകളുടെ വികസനം വേഗത്തിലാകും

പാതയുടെ സർവ്വേ ജോലികൾ പുരോഗമിക്കുകയാണ്. എത്രയും വേഗം സർവ്വേ പൂർത്തിയാക്കി അടുത്ത ഘട്ടത്തിലേക്കു കടക്കും

എൻ.കെ. പ്രേമചന്ദ്രൻ എം.പി