കൊല്ലം: വിവിധ വകുപ്പുകളുമായി ബന്ധപ്പെട്ടുള്ള നിർമ്മാണ പ്രവർത്തനങ്ങളുടെ കാലതാമസം ഒഴിവാക്കാൻ ‘റൈറ്റ് ഒഫ് വേ' ഓൺലൈൻ സംവിധാനം നടപ്പിലാക്കുമെന്ന് മന്ത്രി പി.എ. മുഹമ്മദ് റിയാസ് പറഞ്ഞു.

ജില്ലാ കളഫക്ടർ അഫ്‌സാന പർവീണിന്റെ അദ്ധ്യക്ഷതയിൽ ഓൺലൈനായി ചേർന്ന ജില്ലാ ഇൻഫ്രാസ്ട്രക്ചറൽ കോ ഓർഡിനേഷൻ കമ്മിറ്റിയിൽ സംസാരിക്കുകയായിരുന്നു മന്ത്രി. ആശ്രാമം ലിങ്ക് റോഡിന്റെ എക്സ്റ്റൻഷൻ പ്രവൃത്തിയിലുള്ള കാലതാമസം പരിഹരിക്കുന്നതിന് കളക്ടറുടെ നേതൃത്വത്തിൽ യോഗം വിളിക്കാൻ മന്ത്രി നിർദേശിച്ചു. ഓരോ നിയോജക മണ്ഡലത്തിലെയും പദ്ധതി പുരോഗതി നോഡൽ ഓഫീസർമാർ എം.എൽ.എമാരെ അറിയിക്കണം. വർഷത്തിൽ മൂന്നുതവണ ജനപ്രതിനിധികളും ഉദ്യോഗസ്ഥരും ഉൾപ്പെട്ട ഡി.ഐ.സി.സി വിളിച്ചുചേർത്ത് പദ്ധതി പുരോഗതി പരിശോധിക്കുമെന്നും മന്ത്രി അറിയിച്ചു.

മന്ത്രി ജെ. ചിഞ്ചുറാണി, എം.എൽ.എമാരായ എം.നൗഷാദ്, കോവൂർ കുഞ്ഞുമോൻ, സുജിത്ത് വിജയൻപിള്ള, പി.എസ്.സുപാൽ, കെ.ബി.ഗണേഷ് കുമാർ, പി.സി.വിഷ്ണുനാഥ്, സി.ആർ.മഹേഷ്, പൊതുമരാമത്ത് വകുപ്പ് സെക്രട്ടറി ആനന്ദ് സിംഗ്, ചീഫ് എൻജിനിയർമാരായ അജിത്ത് രാമചന്ദ്രൻ, എസ്. മനോ മോഹനൻ, എൽ. ബീന, എക്‌സി. എൻജിനിയർമാർ, ഉദ്യോഗസ്ഥർ തുടങ്ങിയവർ പങ്കെടുത്തു.