കൊല്ലം: കരുനാഗപ്പള്ളി പട. വടക്കിൽ വൈദ്യുതി മീറ്ററിൽ നിന്ന് തീ പടർന്ന് വീട് കത്തിനശിച്ചു. പട. വടക്ക് കൊച്ചുതറയിൽ ജലജയുടെ മൂന്ന് മുറികളുള്ള വീടാണ് അഗ്നിക്കിരയായത്.

ബുധനാഴ്ച രാത്രി 7 മണിയോടെയായിരുന്നു സംഭവം. ജലജ ടി.വി കണ്ടുകൊണ്ടിരിക്കുമ്പോൾ മീറ്റർ ബോക്സിൽ നിന്ന് ഉച്ചത്തിലുള്ള ശബ്ദത്തിന് പിന്നാലെ തീ ആളിപ്പടരുകയായിരുന്നു. ഓടിട്ട വീട്ടിൽ പൂർണമായും തീ ആളിപ്പടർന്നു. ജലജയുടെ മകൻ വിഷ്ണു ഈ സമയം വീട്ടിൽ ഉണ്ടായിരുന്നില്ല. അയൽവാസികൾ ഏറെ നേരം ശ്രമിച്ചിട്ടും അഗ്നിബാധ നിയന്ത്രണ വിധേയമായില്ല. പിന്നീട് കരുനാഗപ്പള്ളിയിൽ നിന്ന് രണ്ട് യൂണിറ്റ് ഫയർഫോഴ്സെത്തിയാണ് തീ കെടുത്തിയത്.