വൈക്കം : നൂ​റ്റാണ്ടു പിന്നിട്ട വൈക്കത്തെ പഴയ ബോട്ടുജെട്ടി കെട്ടിടം ചരിത്ര സ്മാരകമെന്ന നിലയ്ക്ക് പുനരുദ്ധരിക്കാനുള്ള പ്രവർത്തനങ്ങൾ ആരംഭിച്ചു. രാജ ഭരണ കാലത്ത് നിർമ്മിക്കപ്പെട്ട ഈ ബോട്ടുജെട്ടി അതിന്റെ പഴമയും ഗരിമയും ചോരാതെ ജനഹൃദയങ്ങളിൽ നിലനിർത്തണമെന്ന ആവശ്യം വിവിധ കോണുകളിൽ നിന്ന് ഉയർന്നിരുന്നു. വൈക്കം സത്യഗ്രഹത്തിനു ഊർജം പകരാൻ മഹാത്മജിയടക്കമുള്ള നേതക്കാൾ വൈക്കത്തുവന്നിറങ്ങിയത് ഈ ബോട്ടുജെട്ടി വഴിയാണ്. പഴയ ബോട്ടുജെട്ടി കെട്ടിടത്തിന്റെ തനിമ നിലനിർത്തുകയും ചരിത്ര പ്രാധാന്യം പരിരക്ഷിക്കുകയും വേണമെന്ന ജനകീയ ആവശ്യം പരിഗണിച്ച് സംസ്ഥാന സർക്കാർ 42 ലക്ഷംരൂപ അനുവദിച്ചിരുന്നു. ഈ തുക കൊണ്ടാണ് ഇപ്പോൾ നിർമ്മാണ പ്രവർത്തനങ്ങൾ ആരംഭിച്ചത്.

ഇറിഗേഷൻ വകുപ്പാണ് പുനർനിർമ്മാണപ്രവർത്തനം നടത്തുന്നത്. പഴയ ബോട്ട് ജെട്ടിയുടെ പ്ളാ​റ്റ്‌ഫോം വീതി കൂട്ടി പുനർനിർമ്മിച്ചു. കെട്ടിടത്തിന്റെ പൊട്ടിപ്പൊളിഞ്ഞ കരിങ്കൽസംരക്ഷണ ഭിത്തിയുടെ പുനർനിർമ്മാണവും കായലിലേയ്ക്കു നീണ്ട പ്ളാ​റ്റ് ഫോം കോൺക്രീ​റ്റ് ചെയ്ത് ഉയരം കൂട്ടുന്ന പണികളുമാണ് ഇപ്പോൾ പുരോഗമിക്കുന്നത്. കെട്ടിടത്തിൽ ഭിത്തികൾക്കു പകരം പലകകളാണ് പാകിയിരുന്നത്. മേൽക്കൂരയിലെ ആസ്ബ​റ്റോസ് ഷീ​റ്റുകൾ കാലപ്പഴക്കത്താൽ ജീർണിച്ചു പൊട്ടിയപ്പോൾ കെട്ടിടത്തിനു ചോർച്ചയുണ്ടായതിനെ തുടർന്ന് അകത്തെ തടികളും ചിലത് ജീർണിച്ചു. കൂട്ടിലെ കേടായ തടികൾ മാ​റ്റി പുതിയവ സ്ഥാപിച്ച് ബലപ്പെടുത്തിയാൽ ഇനിയും ഒരുപാടു വർഷങ്ങൾ ഈ ചരിത്ര സ്മാരകം തനിമ ചോരാതെ നിലനിറുത്താനാകും. പുനർ നിർമ്മാണത്തിന്റെ ഭാഗമായി കെട്ടിടത്തിന്റെ കൂട്ടുമാ​റ്റി പകരം ഇരുമ്പു പൈപ്പുകൾ സ്ഥാപിക്കാനുള്ള അധികൃതരുടെ നീക്കത്തിനെതിരെ പ്രതിഷേധം ഉയർന്നിരുന്നു. ഉപ്പു കാ​റ്റടിക്കുന്ന കായലോരത്ത് പരിസ്ഥിതിക്കിണങ്ങും വിധം നിർമ്മിക്കപ്പെട്ട ബോട്ടുജെട്ടിക്കെട്ടിടത്തിൽ ഇരുമ്പു പൈപ്പുകൾ സ്ഥാപിച്ചാൽ അധികം വൈകാതെ തുരുമ്പിച്ചു നശിക്കുമെന്നായിരുന്നു വിമർശനം.

 മഹാത്മജിപ്പോലുള്ളവരുടെ പാദസ്പർശം കൊണ്ട് പവിത്രം

 രാജ ഭരണ കാലത്ത് നിർമ്മിക്കപ്പെട്ട, രാജമുദ്രയുള്ള മന്ദിരം

 പുനർനിർമ്മാണം നടത്തുന്നത് ഇറിഗേഷൻ വകുപ്പ്

 സർക്കാർ അനുവദിച്ചത്

42 ലക്ഷംരൂപ

'ചരിത്ര സ്മാരകമെന്ന നിലയിൽ അതിന്റെ പഴമ നിലനിർത്തുകയെന്നത് പ്രധാനമാണ്. പുതിയൊരു കെട്ടി‌ടമല്ല, ചരിത്രകുതുകികൾ ഇവിട‌െ പ്രതീക്ഷിക്കുന്നത്'

- വിനോദ് ഭാസ്കർൻ, വൈക്കം