കോട്ടയം: തിരുവാർപ്പ് മർത്തശ്മുനി പള്ളിയെ സംബന്ധിച്ച ഹൈക്കോടതി വിധി നിയമവാഴ്ച എന്നെന്നും നിലനിൽക്കുമെന്നതിന്റെ ഉദാഹരണമാണെന്ന് സുന്നഹദോസ് സെക്രട്ടറി ഡോ.യൂഹാനോൻ മാർ ദീയസ്‌കോറസ് മെത്രാപ്പോലീത്ത. ആറാഴ്ചക്കുളളിൽ വിധി നടപ്പാക്കണമെന്ന ഉത്തരവ് സഭ സ്വാഗതം ചെയ്യുന്നു. പളളി ഓർത്തഡോക്‌സ് സഭയുടെ 1934 ഭരണഘടന പ്രകാരം ഭരിക്കപ്പെടണമെന്ന് കോട്ടയം മുൻസിഫ് കോടതി ഉത്തരവ് വന്നിട്ട് രണ്ട് വർഷമായി. ഒരു വർഷം മുമ്പ് കോടതി നിർദ്ദേശപ്രകാരം പളളി കളക്ടർ ഏറ്റെടുത്തു. എന്നിട്ടും പള്ളി ഓർത്തഡോക്‌സ് സഭയ്ക്ക് കൈമാറാൻ തയ്യാറാകാത്ത സാഹചര്യത്തിലാണ് പൊലീസ് പ്രൊട്ടക്ഷൻ ആവശ്യപ്പെട്ട് ഹൈക്കോടതിയിൽ ഹർജി നൽകിയത്.