കോട്ടയം. കേന്ദ്ര സാമൂഹ്യനീതി വകുപ്പിന്റെ എ.ഡി.ഐ.പി പദ്ധതിയിലുൾപ്പെടുത്തി കോട്ടയം പാർലമെന്റ് മണ്ഡലത്തിലെ 1258 ഭിന്നശേഷിക്കാർക്ക് സഹായ ഉപകരണങ്ങൾ ലഭ്യമാക്കും. 96 ലക്ഷം രൂപയാണ് ചെലവ്. സാമൂഹ്യനീതി വകുപ്പ്, ബ്ലോക്ക് പഞ്ചായത്തുകൾ, അങ്കണവാടി പ്രവർത്തകർ, ആരോഗ്യവകുപ്പ്, ആർച്ച് ബിഷപ്പ് കുര്യാക്കോസ് കുന്നശേരി ഫൗണ്ടേഷൻ എന്നിവയുടെ സഹകരണത്തോടെ ബ്ലോക്ക് തലങ്ങളിൽ നടത്തിയ 12 ക്യാമ്പുകളിൽനിന്ന് തെരഞ്ഞെടുക്കപ്പെട്ടവർക്കാണ് ഉപകരണങ്ങൾ.
അടുത്തഘട്ടമായി മുതിർന്ന പൗരൻമാർക്കും ഉപകരണങ്ങൾ ലഭ്യമാക്കുമെന്ന് തോമസ് ചാഴികാടൻ എം.പി പത്രസമ്മേളനത്തിൽ പറഞ്ഞു. ഇതിനായി ക്യാമ്പുകളും നടത്തും. നാലിന് രാവിലെ 11.30ന് ബി.സി.എം കോളേജ് ഓഡിറ്റോറിയത്തിൽ കേന്ദ്ര മന്ത്രി നാരായണ വിതരണോദ്ഘാടനം നിർവഹിക്കും.