കാഞ്ഞിരപ്പള്ളി. കാഞ്ഞിരപ്പള്ളിയിൽ കലയുടെ മണി മുഴങ്ങുകയാണ്. നാട് ആവേശം പകരുകയാണ്.

കൊവിഡിന് ശേഷം അരങ്ങുണർന്നതോടെ 33-ാമത് റവന്യൂ ജില്ലാ സ്കൂൾ കലോത്സവത്തിന് കാഞ്ഞിരപ്പള്ളിയിൽ വർണാഭമായ തുടക്കം. സെന്റ് ഡൊമിനിക്സ് സ്കൂൾ ഓഡിറ്റോറിയത്തിൽ ചീഫ് വിപ്പ് ഡോ.എൻ ജയരാജ് കലോത്സവം ഉദ്‌ഘാടനം ചെയ്തു. ജില്ലാ പഞ്ചായത്ത് പ്രസിഡ​ന്റ് നിർമ്മല ജിമ്മി അദ്ധ്യക്ഷത വഹിച്ചു. ചലച്ചിത്രതാരം ബാബു ആ​ന്റണി മുഖ്യാതിഥിയായിരുന്നു. ഉച്ചകഴിഞ്ഞ് സെ​ന്റ് മേരീസ് സ്കൂളിൽ നിന്ന് വർണശബളമായ സാംസ്കാരിക ഘോഷയാത്ര ആരംഭിച്ചു. ചെണ്ടമേളത്തി​ന്റെയും ബാ​ന്റ് മേളത്തി​ന്റെയും അകമ്പടിയോടെ നടന്ന ഘോഷയാത്രയിൽ സംഘാടകസമിതി അം​ഗങ്ങളും വിദ്യാർത്ഥികളും പങ്കെടുത്തു. ക്രിസ്മസ് പാപ്പായുടെ വേഷമണിഞ്ഞ കുട്ടികളും ലോകകപ്പ് ആവേശം നിറച്ച് പ്രമുഖ ടീമുകളുടെ ജഴ്സി അണിഞ്ഞ കുട്ടികളും ഭൂമീദേവിയും മാവേലിയും ഒപ്പനചുവടുകളും ​ഘോഷയാത്രയെ കൂടുതൽ ​ഗംഭീരമാക്കി.

ആദ്യദിനം ഏറെയും രചനാമത്സരങ്ങളായിരുന്നു. മത്സരങ്ങൾ വൈകിയതിലും വിധി കർത്താക്കളെ ചൊല്ലിയും പ്രതിഷേധങ്ങളുയർന്നു. രണ്ടാം വേദിയിൽ നടക്കാനിരുന്ന സംസ്കൃതോത്സവം മുന്നറിയിപ്പില്ലാതെ വേദി ഒന്നിലേക്ക് മാറ്റിയത് പ്രതിഷേധത്തിനിടയാക്കി. ​സ്റ്റേജ് മാനേജർ പോലുമറിയാതെ നടത്തിയ ഈ നീക്കത്തിൽ പ്രതിഷേധിച്ച് കേരള സംസ്കൃത അദ്ധ്യാപക ഫെഡറേഷൻ രം​ഗത്തെത്തി. ഉദ്ഘാടനചടങ്ങിനായാണ് മത്സരങ്ങൾ വേദി മാറ്റി ക്രമീകരിച്ചത്.

യു.പി, ഹൈസ്കൂൾ, ഹയർസെക്കൻഡറി വിഭാഗങ്ങളിലായി 1804 ആൺകുട്ടികളും 3730 പെൺകുട്ടികളും ഉൾപ്പെടെ 5534 വിദ്യാർത്ഥികളാണ് കലാമാമാങ്കത്തിൽ മാറ്റുരക്കുന്നത്. ഇന്ന് 12 വേദികളിലായി മത്സരം നടക്കും. ഭരതനാട്യം, കുച്ചിപ്പുടി, ലളിത​ഗാനം, തിരുവാതിര, ഒപ്പന, നാടകം, കൂടിയാട്ടം, സംഘനൃത്തം തുടങ്ങിയ മത്സരങ്ങൾ ഇന്ന് നടക്കും.