ചുള്ളിയോട് (വയനാട്): സിനിമയിലെ മിന്നുംതാരങ്ങളായ ആദിത്യയ്ക്കും ശ്രീപ്രദയ്ക്കും കളിക്കളത്തിലും തിളക്കം. അമ്പതാമത് സംസ്ഥാന ജൂനിയർ ഖോ-ഖോ ചാമ്പ്യൻഷിപ്പിൽ തിരുവനന്തപുരം ജില്ലയ്ക്കുവേണ്ടിയാണ് ഇരുവരും കളത്തിലിറങ്ങിയത്. ദേശീയ ജൂനിയർ താരങ്ങളായ ഇരുവരും രാഹുൽ സംവിധാനം ചെയ്ത ഖോ-ഖോ സിനിമയിൽ രജിഷ വിജയനോടൊപ്പം അഭിനയിച്ച് കൈയടി നേടിയിരുന്നു. ഖോ-ഖോ കളിയുമായി ബന്ധപ്പെട്ടതായിരുന്നു സിനിമയുടെ പ്രമേയം.
സിനിമയിൽ അഭിനയമായിരുന്നെങ്കിൽ കളിക്കളത്തിൽ പോരാട്ടമാണ്. സിനിമയിൽ ഒരിക്കൽ തോറ്റാൽ റീടെയ്ക്ക് നടത്താം. പക്ഷേ , ഇവിടെ ഒരിക്കൽ തോറ്റാൽ കളിക്കളം കാണില്ല. നോക്കൗട്ട് അടിസ്ഥാനത്തിലാണ് മത്സരം. ഇവരുടെ അർപ്പണ മനോഭാവത്തെ കരുത്തുറ്റതാക്കുന്നതിനുള്ള തന്ത്രങ്ങളാണ് കോച്ച് ഷോബിയ മെനയുന്നത്.
കൂലിപ്പണിക്കാരായ കുട്ടൻ - സ്മിതാകുമാരി ദമ്പതികളുടെ മകളാണ് പ്ലസ്ടു വിദ്യാർത്ഥിനിയായ ആദിത്യ. ആറ്റിങ്ങലിലെ സ്‌പോർട്സ് ഹോസ്റ്റലിൽ നിന്നാണ് പഠനം. ഗവ.പ്രസിലെ ജീവനക്കാരനായിരുന്ന പരേതനായ പ്രദീപന്റെയും യൂണിവേഴ്സിറ്റി കോളേജിലെ ലൈബ്രറി ജീവനക്കാരി ശ്രീലതയുടെയും മകളാണ് പത്താം ക്ലാസുകാരിയായ ശ്രീപ്രദ.