മണ്ണാർക്കാട്: ജനാധിപത്യപരമായ അഭിസംബോധന നടപ്പിൽ വരുത്തി പ്രമേയം പാസാക്കിയ സംസ്ഥാനത്തെ ആദ്യ നഗരസഭയായി മണ്ണാർക്കാട്. ഇനി മുതൽ പൊതുജനങ്ങൾക്ക് ജീവനക്കാരെയും ജനപ്രതിനിധികളെയും സർ, മാഡം എന്ന് വിളിക്കേണ്ട, പരാതികളിലും കത്തുകളിലും അപേക്ഷ, അഭ്യർത്ഥന എന്നും ചേർക്കേണ്ട. ഈ അഭിസംബോധനകൾ ഒഴിവാക്കാൻ ഇന്നലെ ചേർന്ന നഗരസഭാ കൗൺസിൽ പ്രമേയത്തിലൂടെ തീരുമാനമെടുത്തു. ആറാം വാർഡ് കൗൺസിലർ അരുൺകുമാർ പാലക്കുറുശ്ശിയാണ് പ്രമേയം അവതരിപ്പിച്ചത്. പ്രമേയം ഐകകണ്‌ഠേന പാസാക്കുകയായിരുന്നുവെന്ന് നഗരസഭാ ചെയർമാൻ അറിയിച്ചു.