കടമ്പനാട് : പച്ചിലയിൽ ദേശീയ നേതാക്കളുടെ ചിത്രം വരച്ച് വിസ്മയം തീർത്ത കൊച്ചുകലാകാരി വിസ്മയശ്രീക്ക് ഇന്ത്യാ ബുക്ക് ഒഫ് റെക്കോർഡ്‌സ്‌ അംഗീകാരം. പയ്യനല്ലൂർ കാവിന്റെ വടക്കതിൽ ആർ രാധാകൃഷ്ണപിള്ളയുടെയും കലയുടെയും മകളാണ് വിസ്മയ . രാഷ്ട്രപതിമാർ, പ്രധാനമന്ത്രിമാർ, എന്നിവരുടെ ഉൾപ്പടെ 21 ദേശീയ നേതാക്കളുടെ ചിത്രങ്ങളാണ് പച്ചിലയിൽ വരച്ചത്. വാഴയിലയിലും പ്ലാവിളയിലും തേക്കിലയിലും വട്ടക്കുമ്പിളിന്റെ ഇലയിലുമാണ് പേന കൊണ്ട് വരച്ച് കാർവ് ചെയ്തെടുത്തത്. വാഴയിലയിൽ പി.വി.നരസിംഹറാവു, പ്രതിഭാ പാട്ടീൽ , ഐ കെ ഗുജ്റാൾ, തേക്കിലയിൽ ഇന്ദിരാ ഗാന്ധി, ചരൺ സിംഗ്, മൻമോഹൻ സിംഗ്, ദേവഗൗഡ, എ.ബി.വാജ്പേയ്, പ്രണബ് മുഖർജി, കെ.ആർ.നാരായണൻ , വി.പി.സിങ്, ഗുൽസാരിലാൽനന്ദ, ശങ്കർ ദയാൽ ശർമ്മ, നരേന്ദ്ര മോദി , വട്ടക്കുമ്പിളിന്റെ ഇലയിൽ എ.പി.ജെ അബ്ദുൽ കലാം, രാജീവ് ഗാന്ധി, ചന്ദ്രശേഖർ, ലാൽ ബഹാദൂർ ശാസ്ത്രി , പ്ലാവിലയിൽ മൊറാർജി ദേശായി എന്നിവരുടെ ചിത്രങ്ങളാണ് വരച്ചത്. വരയ്ക്കുന്നതിന്റെ വീഡിയോയും ചിത്രങ്ങളും ഇന്ത്യൻ ബുക്ക് ഒഫ് റെക്കോർഡ്‌സിന് അയച്ചുകൊടുത്തിരുന്നു. അംഗീകാരം ലഭിച്ചതിന്റെ സർട്ടിഫിക്കറ്റ് കഴിഞ്ഞ ദിവസം വീട്ടിലെത്തി. തിരുവനന്തപുരം യു.ഐ.എം - ഐ.സി.എം കോളേജിലെ എം.ബി.എ വിദ്യാർത്ഥിനിയാണ്.