അടൂർ : പന്നികൾ വി​ള നശി​പ്പി​ച്ചതി​നാൽ കഷ്ടത്തി​ലായ കർഷകർക്ക് തി​രി​ച്ചടി​യായി​ വാവലുകളുടെ ശല്യവും. ഓണക്കാലം ലക്ഷ്യമിട്ട് കൃഷി ചെയ്ത ഏത്തവാഴകൾ കുലച്ച് പടല വിരിയും മുമ്പേ വാവലുകൾ നശിപ്പിക്കുകയാണ്. വാഴക്കുലകളി​ലെ തേൻ കുടിക്കാനായി കൂട്ടത്തോടെ എത്തുന്ന വാവലുകൾ വിരിഞ്ഞുവരുന്ന കുലയിൽ ഞാന്നുകിടക്കുന്നതി​നാൽ കുല ഒടിഞ്ഞു പോകുകയാണ്. രാത്രിയിലാണ് ഇവ കൂട്ടത്തോടെ എത്തുന്നത്. വിരിഞ്ഞ് വളർച്ചയെത്തിയാൽ ആറ് പടലയിലധികം വലുപ്പം വരുന്ന കുലകളുടെ കൂമ്പുകളാണ് കൂട്ടത്തോടെ വാവലുകൾ നശി​പ്പി​ക്കുന്നത്. ആയിരക്കണക്കിന് രൂപ മുടക്കി പരിപാലിച്ച ഏത്തവാഴയുടെ വിളവെടുക്കുന്ന സമയത്ത് ഉണ്ടായിരിക്കുന്ന ശല്യം കർഷകർക്ക് വലി​യ നഷ്ടമൊരുക്കും. ഓണക്കാല വിപണി ലക്ഷ്യമിട്ടാണ് മിക്കവരും കൃഷി ചെയ്തിരിക്കുന്നത്. ബാങ്ക് ലോണെടുത്തും കൃഷി ചെയ്ത കർഷകരുമുണ്ട്. മുമ്പ് നിരവധി വാഴകൾ പന്നി നശിപ്പിച്ചി​രുന്നു. ഇതിൽ നിന്ന് രക്ഷപെടാൻ വേലികെട്ടിയും രാത്രി കാവലിരുന്നും പരിപാലിച്ചെടുത്ത വാഴകളാണ് വാവലുകൾ നശി​പ്പി​ക്കുന്നത്. വാവലുകളുടെ ശല്യത്തിനു എന്തുപ്രതിരോധം തീർക്കണമെന്ന് കർഷകർക്ക് ഒരു നിശ്ചയവുമില്ല. കുലയ്ക്ക് ചുറ്റും മുള്ളു വരിഞ്ഞുവച്ച് ഇവയുടെ ശല്യം ഒഴിവാക്കാൻ നടത്തി​യ ശ്രമവും വേണ്ടത്ര ഫലം കണ്ടില്ല. നിരവധി കർഷകരാണ് വയലുകളിലും കരയിലുമായി ഏത്തവാഴ കൃഷി ചെയ്തിരിക്കുന്നത്. ഏറത്ത്, കടമ്പനാട് പള്ളിക്കൽ,വില്ലേജുകളിലാണ് വാഴ കർഷകർ ഏറെ ദുരിതത്തിലായത്.