ശബരിമല : സന്നിധാനത്ത് മാളികപ്പുറം ക്ഷേത്രത്തിന് സമീപത്തെ ശിവഗിരി മഠത്തിന്റെ ബുക്ക് സ്റ്റാളിനുള്ളിൽ വളരുന്ന മഹാഗണിമരം തീർത്ഥാടകാരിൽ കൗതുകമുണർത്തുന്നു. 23 വർഷങ്ങൾക്ക് മുൻപ് ബുക്ക് സ്റ്റാളിന്റെ പ്രവർത്തനം തുടങ്ങുബോൾ ഇവിടെ നിന്നിരുന്ന മഹാഗണിയുടെ തൈയാണ് ഇപ്പോൾ വളർന്നു പന്തലിച്ചത്. ബുക്ക് സ്റ്റാളിനുള്ളിൽ മരത്തിന്റെ തായ്ത്തടിയും മേൽക്കൂരയ്ക്ക് മുകളിൽ തണലേകി ശിഖരങ്ങളും കാണാം. തീർത്ഥാടകർ മരത്തെ കൗതുകത്തോടെയാണ് നോക്കിക്കാണുന്നത്. ബുക്ക് സ്റ്റാളിന്റെ മേൽക്കൂരയിൽ ശിഖരങ്ങൾ പടർന്നു പന്തലിച്ചു നിൽക്കുന്നതിനാൽ എപ്പോഴും നല്ല തണുത്ത അന്തരീക്ഷമാണുള്ളത്. ആദ്ധ്യാത്മീക പുസ്തകങ്ങൾക്കായി മഠത്തിന്റെ സ്റ്റാൾ തേടിയെത്തുന്ന തീർത്ഥാടകർ ഏറെയാണ്. ദർശനം കഴിഞ്ഞു മലയിറങ്ങുന്നതിന് മുൻപ് ഇവിടെയെത്തി പുസ്തകങ്ങൾ വാങ്ങി മടങ്ങുന്ന പതിവ് വർഷങ്ങളായി തുടരുന്നവരുണ്ട്. ശ്രീനാരായണ ധർമ്മസംഘം ട്രസ്റ്റിലെ സ്വാമി ശാരദാനന്ദയുടെ മേൽനോട്ടത്തിലാണ് സ്റ്റാളിന്റെ പ്രവർത്തനം. അദ്ധ്യാത്മീക പ്രസിദ്ധീകരണങ്ങൾ ലഭിക്കുന്ന സന്നിധാനത്തെ ഏക സ്ഥാപനമാണിത്. അയ്യപ്പനെയും ശ്രീനാരായണ ഗുരുദേവനെയും കുറിച്ചുള്ള കൃതികളാണ് ഏറെയും. സാമൂഹ്യ പരിഷ്കർത്താക്കളുടെ ജീവചരിത്രങ്ങളും ഇവിടെയുണ്ട്. ശിവഗിരി മഠത്തിന്റെ പുസ്തകങ്ങൾ ഇവിടെ ഡിസ്‌കൗണ്ടിൽ ലഭിക്കും. മഹാഭാരതം, അദ്ധ്യാത്മികരാമായണം , ഭഗവത്ഗീത, മഹാഭാഗവതം എന്നിവയും ഡിസ്‌കൗണ്ടിൽ ലഭിക്കും. സ്തോത്രകൃതികൾ, സന്ധ്യനാമപുസ്തകങ്ങൾ, പ്രാർത്ഥന പുസ്തകങ്ങൾ എന്നിവയ്ക്ക് പുറമെ കേരള ഭാഷ ഇൻസ്റ്റിറ്റ്യൂട്ട് പ്രസിദ്ധീകരിച്ച പ്രൊഫ.കെ.ജി.ബാലകൃഷ്ണൻ നായരുടെ ശ്രീനാരായണ ഗുരുദേവ കൃതികളുടെ സമ്പൂർണ്ണ വ്യാഖ്യാനവും ലഭ്യമാണ്. അയ്യപ്പഭക്തന്മാർക്കുള്ള തുണിത്തരങ്ങളും കുങ്കുമം, കളഭം, മാലകൾ, മോതിരങ്ങൾ, വളകൾ , ചരടുകൾ എന്നിവയും ശിവഗിരി മഠം ബുക്ക് സ്റ്റാളിൽ ലഭിക്കും.