വടകര: താലൂക്കോഫീസ് തീവച്ച് നശിപ്പിച്ച കേസിൽ പ്രതിയെ കോടതി വെറുതെ വിട്ടു. ഹൈദരാബാദ് സ്വദേശി നാരായണ സതീഷിനെയാണ് (40) കുറ്റക്കാരനല്ലെന്ന് കണ്ട് വടകര ജില്ലാ അസിസ്റ്റന്റ് സെഷൻസ് കോടതി വെറുതെ വിട്ടത്. കേസ് തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് ചൂണ്ടിക്കാട്ടിയാണ് പ്രതിയെ കോടതി വെറുതെ വിട്ടത്. 2021 ഡിസംബർ 17നായിരുന്നു താലൂക്ക് ഓഫീസ് കത്തിനശിച്ച സംഭവം. പുലർച്ചെയുണ്ടായ അഗ്നിബാധയിൽ കെട്ടിടവും രേഖകളും ഫർണിച്ചറും കമ്പ്യൂട്ടറും ഉൾപ്പെടെ കത്തിനശിച്ചു. താലൂക്ക് ഓഫീസ് തീവെപ്പ് കേസിനൊപ്പം എൽ.എ ഓഫിസ് പരിസരത്തെ തീവെപ്പ്, ഡി.ഇ.ഒ ഓഫീസ് ശുചിമുറിയിലെ തീവെപ്പ്, എടോടി സിറ്റി സെന്റർ കെട്ടിടത്തിലെ തീവെപ്പ് എന്നീ കേസുകളിലും നാരായണസതീഷ് പ്രതിയാണ്. ഇവയിലും കോടതി ഇയാളെ വെറുതെവിട്ടു. തീവെപ്പിൽ കോടികളുടെ നഷ്ടമാണുണ്ടായത്. താലൂക്ക് ഓഫീസ് തീവെപ്പിനുശേഷം പ്രതി കോടതിക്ക് സമീപത്തെ ചായക്കടയിൽ എത്തിയിരുന്നു. താലൂക്ക് ഓഫീസ് പരിസരത്ത് നിർത്തിയിട്ട ഡിപ്പാർട്ട്മെന്റ് ജീപ്പിൽ സീറ്റിനു കവർ ചെയ്ത ഷാൾ പുതച്ചാണ് പ്രതി ചായക്കടയിലെത്തിയത്. ഈ ഷാൾ പ്രതി താമസിച്ച കേരളാ കൊയർ തിയറ്ററിനടുത്തുള്ള സ്വകാര്യ വ്യക്തിയുടെ വീട്ടിൽനിന്ന് പോലീസ് കണ്ടെടുത്തിരുന്നു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |