തൃശൂർ : കെ.സുധാകരൻ എം.പി മത്സരിക്കാനില്ലെന്ന നിലപാട് ആവർത്തിച്ചതോടെ കണ്ണൂരിലും കഴിഞ്ഞതവണ കൈവിട്ട ആലപ്പുഴയിലും കോൺഗ്രസ് പുതിയ സ്ഥാനാർത്ഥികളെ തേടിയേക്കും. ഇന്നലെ തൃശൂരിൽ കെ.പി.സി.സി പ്രസിഡന്റ് കെ.സുധാകരന്റെ അദ്ധ്യക്ഷതയിൽ ചേർന്ന യോഗത്തിലാണ് തീരുമാനം. എ.ഐ.സി.സി സംഘടനാ ജനറൽ സെക്രട്ടറി കെ.സി.വേണുഗോപാൽ ഇപ്രാവശ്യവും മത്സരിച്ചേക്കില്ല. ഇന്നലെ നടന്ന തിരഞ്ഞെടുപ്പ് സമിതി യോഗത്തിൽ കെ.സുധാകരനും മാവേലിക്കരയിലെ ലോക്സഭാംഗം കൊടിക്കുന്നിൽ സുരേഷും മത്സരിക്കാനില്ലെന്ന് വ്യക്തമാക്കി. കെ.മുരളീധരൻ മത്സരരംഗത്ത് നിന്ന് വിട്ടുനിൽക്കണമെന്ന ആഗ്രഹം പ്രകടിപ്പിച്ചു. പക്ഷേ നേതൃത്വം അനുകൂലമായി പ്രതികരിച്ചില്ല. മത്സരിക്കാനില്ലെന്ന് പല എം.പിമാരും അറിയിച്ചെങ്കിലും കോൺഗ്രസ് ഉന്നതസമിതി അത് തള്ളിക്കളഞ്ഞു.
സിറ്റിംഗ് എം.പിമാർ മത്സരിക്കണമെന്നാണ് ഹൈക്കമാൻഡ് നിർദ്ദേശം. എന്നാൽ കെ.പി.സി.സി പ്രസിഡന്റായതിനാൽ കെ.സുധാകരന്റെ കാര്യത്തിൽ നേതൃത്വം അനുകൂല നിലപാട് സ്വീകരിച്ചേക്കും. കോൺഗ്രസ് നേതൃത്വം എടുക്കുന്ന ഏത് തീരുമാനവും അംഗീകരിക്കുമെന്ന് യോഗ ശേഷം കെ.മുരളീധരൻ എം.പി കേരളകൗമുദിയോട് പ്രതികരിച്ചു. ലീഗ് മൂന്നാം സീറ്റ് വാദം ഉന്നയിക്കുന്നത് തലവേദന സൃഷ്ടിക്കുന്നുണ്ടെങ്കിലും അത് പരിഹരിക്കാമെന്ന ആത്മവിശ്വാസമാണ് നേതൃത്വത്തിനുള്ളത്. ലീഗിന്റേത് ന്യായമായ ആവശ്യമാണെങ്കിലും തുറന്ന ചർച്ചയിലൂടെ ഇതെല്ലാം പരിഹരിക്കുമെന്ന് പ്രതിപക്ഷ നേതാവ് വി.ഡി.സതീശൻ വ്യക്തമാക്കി.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |