കൊടുങ്ങല്ലൂർ: പാർട്ടി നേതൃത്വത്തിന് രാജിക്കത്ത് നൽകിയ കൊടുങ്ങല്ലൂരിലെ സി.പി.ഐ കൗൺസിലർമാർ ഇന്നലെ നടന്ന നഗരസഭാ യോഗത്തിൽ നിന്നും വിട്ടു നിന്നതിനെച്ചൊല്ലി അഭ്യൂഹം. നഗരസഭാ വൈസ് ചെയർമാൻ അഡ്വ. വി.എസ്. ദിനൽ, കൗൺസിലർ രവീന്ദ്രൻ നടുമുറി എന്നിവരാണ് പ്രതിഷേധ സൂചകമായി നഗരസഭാ യോഗത്തിൽ നിന്നും വിട്ടുനിന്നത്.
സി.സി. വിപിൻ ചന്ദ്രൻ സെക്രട്ടറിയായിരുന്ന കൊടുങ്ങല്ലൂർ മണ്ഡലം കമ്മിറ്റി പിരിച്ചുവിട്ടതിനെതിരെ ഇരുവരും നഗരസഭാ കൗൺസിലർ സ്ഥാനം ഉൾപ്പെടെയുള്ള സ്ഥാനങ്ങൾ രാജിവച്ചതായുള്ള കത്ത് പാർട്ടി ജില്ലാ സെക്രട്ടറിക്ക് കൈമാറിയിരുന്നു. എന്നാൽ നഗരസഭാ സെക്രട്ടറിക്ക് ഔദ്യോഗികമായി ഇവർ രാജി നൽകിയിട്ടില്ല.
വൈസ് ചെയർമാൻ വി.എസ്. ദിനലും കൗൺസിലർ രവീന്ദ്രൻ നടുമുറിയും നൽകിയ കത്ത് ചർച്ച ചെയ്ത് തീരുമാനമെടുക്കാമെന്ന് സി.പി.ഐ ജില്ലാ നേതൃത്വം അറിയിച്ചിരുന്നു. എന്നാൽ മറുപടിയൊന്നും ലഭിക്കാത്ത സാഹചര്യത്തിലാണ് കൗൺസിൽ യോഗത്തിൽ നിന്നും വിട്ടുനിന്നതെന്ന് വി.എസ്. ദിനൽ പറഞ്ഞു.
അടുത്ത ദിവസം നടക്കുന്ന സി.പി.ഐ ജില്ലാ കമ്മിറ്റി യോഗത്തിൽ തീരുമാനമുണ്ടാകുമെന്ന പ്രത്യാശയിലാണ് ഇരുവരും. പ്രശ്നപരിഹാരമായില്ലെങ്കിൽ നഗരസഭാ സെക്രട്ടറിക്ക് രാജി നൽകാനാണ് ആലോചന. നഗരസഭാ ഭരണത്തെ ബാധിക്കാത്ത വിധം പ്രശ്നം പരിഹരിക്കണമെന്ന് സി.പി.എം, സി.പി.ഐ ജില്ലാ നേതൃത്വത്തോട് ആവശ്യപ്പെട്ടിട്ടുണ്ട്.
സി.പി.ഐയുടെ അഭ്യന്തര പ്രശ്നങ്ങളിൽ ഇടപെടാൻ ആഗ്രഹിക്കുന്നില്ല. നഗരസഭാ ഭരണത്തെ ബാധിക്കരുതെന്ന് ആവശ്യപ്പെട്ടിട്ടുണ്ട്.
- കെ.ആർ. ജൈത്രൻ, സി.പി.എം ഏരിയ സെക്രട്ടറി
സി.പി.ഐ ജില്ലാ നേതൃത്വത്തിന് നൽകിയ കത്തിന് മറുപടി ലഭിക്കാത്ത സാഹചര്യത്തിലാണ് കൗൺസിൽ യോഗത്തിൽ നിന്നും വിട്ടുനിന്നത്.
- അഡ്വ. വി.എസ്. ദിനൽ, നഗരസഭാ വൈസ് ചെയർമാൻ
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |