തൃശൂർ: കൊവിഡ് വ്യാപനം രൂക്ഷമായ സാഹചര്യത്തിൽ വോട്ടെണ്ണൽ ദിവസമായ മേയ് 2 ന് ജില്ലയിലാകെ നിയന്ത്രണം കർശനമാക്കാൻ ജില്ലാ ഭരണകൂടം. ഇതു സംബന്ധിച്ച് കളക്ടർ എസ്. ഷാനവാസ് വിവിധ രാഷ്ട്രീയ പാർട്ടി പ്രതിനിധികളുടെ യോഗം ചേർന്നു. ആഹ്ലാദ പ്രകടനമുണ്ടാവില്ലെന്നും പാർട്ടി പ്രവർത്തകർ അന്നേ ദിവസം അനാവശ്യമായി പുറത്തിറങ്ങില്ലെന്നും കൂട്ടംകൂടില്ലെന്നും രാഷ്ടീയ പാർട്ടി പ്രതിനിധികൾ കളക്ടർക്ക് ഉറപ്പു നൽകി.
വോട്ടെണ്ണൽ ദിവസം കർഫ്യൂ നിലവിലുള്ള സാഹചര്യത്തിൽ പൊതുജനങ്ങൾ പുറത്തിറങ്ങാനോ കൂട്ടം കൂടി നിൽക്കാനോ പാടില്ല. ആഹ്ളാദ പ്രകടനം, പ്രതിഷേധ പ്രകടനം എന്നിവയ്ക്കും നിരോധനമുണ്ട്. മേയ് 2, 3, 4 തിയതികളിൽ തിരഞ്ഞെടുപ്പ് വിജയം ആഘോഷിക്കുന്നതിന് കടുത്ത നിയന്ത്രണം തുടരുമെന്നും കളക്ടർ അറിയിച്ചു. വോട്ടെണ്ണൽ കേന്ദ്രങ്ങളിൽ പോളിംഗ് ഏജന്റുമാരായി ചുമതലയുള്ളവർ നിർബന്ധമായും ആർ.ടി.പി.സി.ആർ അല്ലെങ്കിൽ ആന്റിജൻ ടെസ്റ്റുകൾ നടത്തിയ സർട്ടിഫിക്കറ്റ് ഹാജരാക്കണം.
നിശ്ചയിക്കപ്പെട്ട പോളിംഗ് ഏജന്റുമാർക്ക് പരിശോധനയിൽ കൊവിഡ് പൊസിറ്റീവാകുന്ന സാഹചര്യത്തിൽ റിസർവ് പോളിംഗ് ഏജന്റുമാരെയും ഉപയോഗപ്പെടുത്താം. ഇവരും കൊവിഡ് പരിശോധന നടത്തി സർട്ടിഫിക്കറ്റ് വാങ്ങണം.
പോളിംഗ് ഡ്യൂട്ടിയിലുള്ള ഉദ്യോഗസ്ഥന്മാർക്ക് ഇന്ന് അതത് വോട്ടെണ്ണൽ കേന്ദ്രങ്ങളിൽ ആന്റിജൻ പരിശോധന നടത്തുമെന്നും ഇതിൽ പോളിംഗ് ഏജന്റുമാർക്ക് പങ്കെടുക്കാമെന്നും കളക്ടർ രാഷ്ട്രീയ പാർട്ടി പ്രതിനിധികളെ അറിയിച്ചു. വിവിധയിടങ്ങളിൽ കണ്ടെയ്ൻമെന്റ് സോൺ പ്രഖ്യാപിച്ച സാഹചര്യത്തിൽ അവിടങ്ങളിൽ അവശ്യ സർവീസുകൾ മാത്രമേ പാടുള്ളൂവെന്നും കളക്ടർ വ്യക്തമാക്കി. വിവിധ രാഷ്ട്രീയ കക്ഷി നേതാക്കന്മാർ, തിരഞ്ഞെടുപ്പ് ഉദ്യോഗസ്ഥർ എന്നിവർ പങ്കെടുത്തു.
വോട്ടെണ്ണൽ : വിപുലമായ സൗകര്യങ്ങൾ
തൃശൂർ: വോട്ടെണ്ണൽ ദിനമായ മേയ് രണ്ടിന് വിപുലമായ സൗകര്യങ്ങളാണ് ജില്ലയിൽ ഒരുക്കിയിരിക്കുന്നത്. വോട്ടെണ്ണൽ വിശദാംശങ്ങൾ തത്സമയം ലഭ്യമാക്കുന്നതിന് മാദ്ധ്യമപ്രവർത്തകർക്ക് മാത്രമായുള്ള കേന്ദ്രീകൃത മീഡിയ സെന്റർ കോൺഫറൻസ് ഹാളിൽ പ്രവർത്തിക്കും.
തിരഞ്ഞെടുപ്പ് കമ്മിഷൻ അനുവദിച്ച അതോറിറ്റി ലെറ്റർ ഉള്ളവർക്ക് മാത്രമാണ് ഇവിടേക്ക് പ്രവേശനം അനുവദിക്കുക. ഇതിന് പുറമേ എല്ലാ വോട്ടെണ്ണൽ കേന്ദ്രങ്ങളിലും റിട്ടേണിംഗ് ഓഫീസർമാരുടെ നേതൃത്വത്തിൽ മീഡിയ സെന്റർ പ്രവർത്തിക്കും. ട്രെൻഡ്സ് ടി.വി എന്ന പ്രത്യേക വെബ്സൈറ്റ് മുഖേനയാണ് ഇവിടെ വിവരങ്ങൾ ലഭ്യമാക്കുക. ബി.എസ്.എൻ.എൽ, റെയിൽ ടെൽ, ഏഷ്യാനെറ്റ് എന്നീ സേവന ദാതാക്കളുടെ സഹായത്തോടെ വോട്ടെണ്ണൽ കേന്ദ്രങ്ങളിൽ തിരഞ്ഞെടുപ്പ് കമ്മിഷന്റെ എൻകോർ എന്ന വെബ്സൈറ്റ് വഴി ഡാറ്റാ എൻഡർ ചെയ്യുകയും ഓരോ റൗണ്ട് കഴിയുമ്പോഴും ട്രെൻഡ്സ് ടിവിയിൽ ലഭ്യമാവുകയും ചെയ്യും. കളക്ടറുടെ ഉപദേശപ്രകാരം എൻ.ഐ.സിയുടെ നേതൃത്വത്തിലാണ് ജില്ലയിൽ സാങ്കേതിക സഹായം ഒരുക്കിയിരിക്കുന്നത്. പൊതുജനങ്ങൾക്ക് വോട്ടെണ്ണൽ ഫലങ്ങൾ Voter helpline എന്ന മൊബൈൽ ആപ്ലിക്കേഷനിലൂടെയും result.eci.nic.in എന്ന വെബ്സൈറ്റിലൂടെയും തത്സമയം അറിയാം.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |