തൃശൂർ : കുട്ടികൾ ഓൺലൈൻ പഠനത്തിന് ഏറെ ബുദ്ധിമുട്ട് നേരിടുന്ന ചെമ്പംകണ്ടം, ഒളകര മേഖലകളിലെ നെറ്റ് വർക്ക് പ്രശ്നങ്ങൾ പരിഹരിക്കാൻ യുദ്ധ കാലാടിസ്ഥാനത്തിൽ പദ്ധതിയൊരുക്കുമെന്ന് കളക്ടർ എസ്. ഷാനവാസ്. ഒരു മാസത്തിനുള്ളിൽ ഇത്തരം പ്രശ്നങ്ങൾ പരിഹരിക്കാനാണ് ശ്രമിക്കുന്നതെന്നും കളക്ടർ വ്യക്തമാക്കി.
പ്രദേശത്തെ ജനപ്രതിനിധികൾ, കേബിൾ ടി.വി ഓപറേറ്റർമാർ, ബി.എസ്.എൻ.എൽ, കെ.എസ്.ഇ.ബി പ്രതിനിധികൾ, ഡി.എഫ്.ഒ, ടി.ഡി.ഒ എന്നിവരുമായി നടത്തിയ ചർച്ചയിലാണ് കളക്ടർ ഇക്കാര്യം വ്യക്തമാക്കിയത്. ഒളകരയിൽ പ്രാദേശിക കേബിൾ ഓപ്പറേറ്റർമാർ വഴി നെറ്റ്വർക്ക് സംവിധാനമെത്തിക്കാനാണ് ഉദ്ദേശിക്കുന്നത്.
ഒളകര ആദിവാസി കോളനിയിലെ അങ്കണവാടി കേന്ദ്രീകരിച്ച് നെറ്റ്വർക്ക് സൗകര്യം ഉപയോഗപ്പെടുത്തും. ഒപ്ടിക്കൽ ഫൈബർ കേബിൾ സംവിധാനത്തിലൂടെ നെറ്റ്വർക്ക് ലഭ്യമാക്കാനാണ് ഉദ്ദേശിക്കുന്നത്. ഇതിനായി ജില്ലാ പഞ്ചായത്തിന്റെയോ ട്രൈബൽ ഡെവലപ്മെന്റ് വകുപ്പിന്റെയോ സഹായം തേടാനും പാണഞ്ചേരി പഞ്ചായത്ത് അധികൃതരോട് കളക്ടർ നിർദേശിച്ചു. വൈഫൈ സംവിധാനം ഉപയോഗപ്പെടുത്താനുള്ള സാദ്ധ്യതയും ഇവിടെ പരിഗണിക്കും. ജില്ലാ വികസന കമ്മിഷണർ അരുൺ കെ. വിജയൻ, സമഗ്ര ശിക്ഷാ കേരള കോർഡിനേറ്റർ ബിന്ദു പരമേശ്വരൻ, എ.ടി.സി ടെലികോം സർക്കിൾ ഡിപ്ലോയ്മെന്റ് ലീഡ് രാഹുൽ ദാസ്, ടി.ഡി.ഒ സന്തോഷ് കുമാർ, രാജേഷ് മാണി എന്നിവർ പങ്കെടുത്തു.
ഇന്റർനെറ്റ് കണക്ടിവിറ്റിയുമായി ജില്ലാ പഞ്ചായത്ത്
തൃശൂർ: ഇന്റർനെറ്റ് കണക്ടിവിറ്റി അപ്രാപ്യമായത് മൂലം ഓൺലൈൻ പഠനക്ലാസുകളിൽ പങ്കെടുക്കാൻ ക്ലേശിക്കുന്ന വിദൂര ആദിവാസി മേഖലകളിൽ ഇന്റർനെറ്റ് കണക്ടിവിറ്റി ലഭ്യമാക്കാൻ തൃശൂർ ജില്ലാ പഞ്ചായത്ത് മുൻകൈയെടുക്കുന്നു.
പാണഞ്ചേരി പഞ്ചായത്തിലെ ഒളകര, പാത്രക്കണ്ടം, വരന്തരപ്പിള്ളി പഞ്ചായത്തിലെ കുണ്ടായി ചക്കിപ്പറമ്പ്, അതിരപ്പിള്ളി പഞ്ചായത്തിലെ പെരിങ്ങൽക്കുത്ത്, മുക്കുംപുഴ, ആനക്കയം, വാച്ച്മരം, തവളക്കുഴിപ്പാറ മുതലായ എല്ലാ ആദിവാസി ഊരുകളിലും ഒപ്ടിക്കൽ ഫൈബർ കേബിൾ ശൃംഖല വഴി ഇന്റർനെറ്റ് ലഭ്യത ഉറപ്പാക്കുമെന്ന് ജില്ലാപഞ്ചായത്ത് പ്രസിഡന്റ് പി.കെ ഡേവിസ് മാസ്റ്റർ അറിയിച്ചു.
പൊതുമേഖലാ സ്ഥാപനമായ ബി.എസ്.എൻ.എൽ, മറ്റ് സ്വകാര്യ ഇന്റർനെറ്റ് സേവനദാതാക്കൾ എന്നിവരുമായി സഹകരിച്ചാകും കണക്ടിവിറ്റി ഉറപ്പ് വരുത്തുക. വൈസ് പ്രസിഡന്റ് ഷീന പറയങ്ങാട്ടിൽ, സ്ഥിരം സമിതി അദ്ധ്യക്ഷരായ പി.എം. അഹമ്മദ്, എ.വി. വല്ലഭൻ, കെ.എസ് ജയ, ലത ചന്ദ്രൻ, സെക്രട്ടറി കെ.ജി തിലകൻ എന്നിവർ സംബന്ധിച്ചു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |