ചാലക്കുടി: മലക്കപ്പാറ യാത്രയ്ക്ക് കൗതുകമായി പത്തടിപ്പാലത്തിനടുത്ത ചണ്ടൻതോട് ഭാഗത്ത് പുലിക്കാഴ്ചയും. ഷോളയാർ കഴിഞ്ഞെത്തുന്ന പ്രദേശമാണ് ചണ്ടൻതോട്. റോഡരികിൽ വെയിൽ കാഞ്ഞു കിടന്ന രണ്ടു പുലിക്കുട്ടികൾ തൊട്ടരികിൽ വാഹനങ്ങളെത്തിയിട്ടും മാറിപ്പോകാൻ കൂട്ടാക്കിയില്ല. വാഹനത്തിലുണ്ടായിരുന്നവർ ഈ ദൃശ്യങ്ങൾ പകർത്തിയെങ്കിലും പുറത്തിറങ്ങാൻ ധൈര്യപ്പെട്ടില്ല. അമ്മപ്പുലി തൊട്ടരികിൽ നിൽപ്പുണ്ടാകുമെന്ന ഭയപ്പാടായിരുന്നു കാരണം. നായയുടെ വലിപ്പം മാത്രമുള്ള കുഞ്ഞുങ്ങൾക്ക് ആറ് മാസം പ്രായമുണ്ടായേക്കുമെന്നാണ് നിഗമനം.

പുലികൾ ധാരാളമുള്ള മേഖലയാണെങ്കിലും ഇത്തരം കാഴ്ച ആദ്യത്തേതാണെന്ന് മലക്കപ്പാറ റോഡിലെ സ്ഥിരം യാത്രക്കാർ പറയുന്നു.