തൃശൂർ : വിലക്കയറ്റത്തിനും, പണപ്പെരുപ്പത്തിനും എതിരെ രാജ്യവ്യാപകമായി കോൺഗ്രസ് നടത്തുന്ന ദേശീയ പ്രക്ഷോഭത്തിന്റെ ഭാഗമായി മുൻ കെ.പി.സി.സി. പ്രസിഡന്റ് വി.എം. സുധീരൻ നയിക്കുന്ന ജൻ ജാഗരൺ അഭിയാൻ പദയാത്ര തിങ്കളാഴ്ച വൈകിട്ട് 4 ന് തെക്കേഗോപുരനടയിൽ നിന്ന് ആരംഭിക്കുമെന്ന് ഡി.സി.സി. പ്രസിഡന്റ് ജോസ് വള്ളൂർ പറഞ്ഞു.
ഡി.സി.സിയുടെ ആഭിമുഖ്യത്തിൽ നടക്കുന്ന പ്രതിഷേധ യാത്രയുടെ ഉദ്ഘാടനം, കേരളത്തിൽ ജീവിച്ചിരിക്കുന്ന സ്വാതന്ത്ര്യ സമര സേനാനികളിൽ ഏറ്റവും പ്രായമുള്ള സ്വാതന്ത്ര്യ സമര സേനാനി 97 വയസുള്ള പാവറട്ടി സ്വദേശി വി.കെ. കൃഷ്ണൻ പതാക കൈമാറി നിർവഹിക്കും. 110 മണ്ഡലങ്ങളിൽ നിന്നും 1,000 കണക്കിന് കോൺഗ്രസ് പ്രവർത്തകന്മാർ പങ്കെടുക്കുന്ന കേന്ദ്ര കേരള സർക്കാരുകൾക്കെതിരെയുള്ള പോരാട്ടങ്ങളുടെ ഒരു വലിയ പ്രതിഷേധമാണ് ഈ പദയാത്ര. സ്വരാജ് റൗണ്ട് ചുറ്റി കൂർക്കഞ്ചേരിയിലൂടെ നെടുപുഴ കസ്തൂർഭ കേന്ദ്രത്തിന് സമീപം പദയാത്ര സമാപിക്കും. സമാപന സമ്മേളനത്തിൽ കോൺഗ്രസിന്റെ ദേശീയ സംസ്ഥാന നേതാക്കൾ പങ്കെടുക്കും. തുടർന്ന് വി.എം. സുധീരന്റെയും, ഡി.സി.സി. പ്രസിഡന്റ് ജോസ് വള്ളൂരിന്റെയും നേതൃത്വത്തിൽ തെരഞ്ഞെടുക്കപെട്ട കോൺഗ്രസ് നേതാക്കൾ നെടുപുഴ കോളനിയിൽ താമസിക്കും. തുടർന്ന് ചൊവ്വാഴ്ച രാവിലെ നെടുപുഴ പ്രദേശത്തെ സാധാരണ ജനങ്ങളുമായി നേതാക്കൾ സംവദിക്കും.
നഗരത്തിൽ ഇന്ന് ഗതാഗത നിയന്ത്രണം
തൃശൂർ : ഡി.സി.സിയുടെ നേതൃത്വത്തിൽ ഇന്ന് നഗരത്തിൽ നടക്കുന്ന റാലിയോട് അനുബന്ധിച്ച് വൈകിട്ട് മൂന്ന് മുതൽ രാത്രി 9 വരെ ഗതാഗത നിയന്ത്രണം ഉണ്ടായിരിക്കുമെന്ന് ട്രാഫിക് പൊലീസ് അറിയിച്ചു. സ്വരാജ് റൗണ്ട്, കുറുപ്പം റോഡ്, ചെട്ടിയങ്ങാടി, വെളിയന്നൂർ, കൂർക്കഞ്ചേരി, വലിയാലുക്കൽ, വനിത പൊളിടെക്നിക്ക് എന്നീ വഴിയിലൂടെയാണ് കടന്നു പോകുന്നത്.
പദയാത്രയിൽ പങ്കെടുക്കുന്നതിന് എത്തുന്ന വളണ്ടിയർമാരെ കൊണ്ടുവരുന്ന വാഹനം പ്രവർത്തകരെ ഇറക്കിയ ശേഷം വലിയാലുക്കലിൽ എത്തിയ ശേഷം നെടുപുഴ വനിതാ പോളിടെക്നിക്കിന് മുൻവശത്തുള്ള ക്ഷേത്രമൈതാനിയിൽ പാർക്ക് ചെയ്യണമെന്ന് പൊലീസ് അറിയിച്ചു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |