തൃശൂർ: വിവിധ മേഖലകളിൽ നടത്തിയ പ്രവർത്തനങ്ങൾ സംസ്ഥാനത്തെ ദേശീയ, അന്തർദ്ദേശീയ നിലവാരത്തിലേക്ക് ഉയർത്തിയെന്ന് ഉന്നത വിദ്യാഭ്യാസ മന്ത്രി ഡോ.ആർ. ബിന്ദു പറഞ്ഞു. ജില്ലാ പഞ്ചായത്ത് ഭരണസമിതിയുടെ ഒന്നാം വാർഷികാഘോഷവും വിജ്ഞാൻ സാഗറിലെ രണ്ട് സെമിനാർ ഹാളുകളുടെ ഉദ്ഘാടനവും നിർവഹിക്കുകയായിരുന്നു അവർ. സംസ്ഥാനത്തെ വികേന്ദ്രീകരണ പ്രവർത്തനങ്ങൾ കേരള മോഡലായി മാറി.
ആരോഗ്യ, വിദ്യാഭ്യാസ മേഖലകളിലുണ്ടായ പ്രവർത്തനങ്ങൾ കേരളത്തിൽ പ്രകാശപൂർണ്ണമായ മാറ്റങ്ങൾക്ക് ഇടയാക്കിയെന്നും മന്ത്രി പറഞ്ഞു. ജനകീയാസൂത്രണ പദ്ധതിയുടെ രജതജൂബിലി ആഘോഷങ്ങളുടെ ഭാഗമായി ജനപ്രതിനിധികളെ ആദരിച്ചു. രാമവർമ്മപുരം വിജ്ഞാൻസാഗർ ഹാളിൽ നടന്ന ചടങ്ങിൽ ജില്ലാ പഞ്ചായത്ത് പ്രസിഡന്റ് പി.കെ ഡേവിസ് അദ്ധ്യക്ഷത വഹിച്ചു. വൈസ് പ്രസിഡന്റ് ഷീന പറയങ്ങാട്ടിൽ, ആരോഗ്യ സ്റ്റാൻഡിംഗ് കമ്മിറ്റി ചെയർമാന്മാരായ എ.വി വല്ലഭൻ, പി.എം അഹമ്മദ്, ലതാ ചന്ദ്രൻ, കെ.എസ് ജയ, ജില്ലാ പഞ്ചായത്ത് സെക്രട്ടറി കെ.ജി തിലകൻ എന്നിവർ പങ്കെടുത്തു.
സഹകരണ പെൻഷനേഴ്സ് അസോ. ജില്ലാ സമ്മേളനം
തൃശൂർ: സഹകരണപെൻഷൻകാരുടെ നിറുത്തലാക്കിയ ക്ഷാമബത്തപുനഃസ്ഥാപിക്കണമെന്ന് സഹകരണ പെൻഷനേഴ്സ് അസോസിയേഷൻ ജില്ലാസമ്മേളനം ആവശ്യപ്പെട്ടു. സി.സി.മുകുന്ദൻ എം.എൽ.എ ഉദ്ഘാടനം ചെയ്തു. പ്രസിഡന്റ് സി.എൽ.റാഫേൽ അദ്ധ്യക്ഷനായി. ജില്ലാ സെക്രട്ടറി ടി.മോഹനൻ, ട്രഷറർ കെ.ജെ.ജോസഫ്, സംസ്ഥാന സെക്രട്ടറി മുണ്ടൂർ രാമകൃഷ്ണൻ, ജില്ലാ വൈസ് പ്രസിഡന്റ് കെ.എം.ചാക്കോ തുടങ്ങിയവർ പ്രസംഗിച്ചു. ഭാരവാഹികൾ: ഇ.എം.ശ്രീധരൻ നമ്പൂതിരി (പ്രസിഡന്റ്), ടി.മോഹനൻ (സെക്രട്ടറി), എം.എൻ.ശശിധരൻ, എം.എ.ജോസഫ് (വൈസ് പ്രസി.), പി.മോഹൻദാസ്, സി.വി.രംഗനാഥൻ (ജോ. സെക്ര.), കെ.എം.ചാക്കോ (ട്രഷറർ).
കൊവിഡ് മരണം: ധനസഹായത്തിന് അപേക്ഷിക്കാം
തൃശൂർ : കൊവിഡ് ബാധിച്ച് മരണപ്പെട്ടവരുടെ അടുത്ത ബന്ധുവിന് 50,000 രൂപ ധനസഹായം നൽകുന്ന സർക്കാർ പദ്ധതിയിലേക്ക് അപേക്ഷിക്കാം. മരണപ്പെട്ടവരുടെ ആശ്രിതർ ഇതിനുള്ള അപേക്ഷ relief.kerala.gov.in എന്ന പോർട്ടൽ വഴിയാണ് സമർപ്പിക്കേണ്ടത്. അപേക്ഷ സമർപ്പിക്കുന്നതിനായി വാർഡ് മെംബർ, ആശാവർക്കർ, അക്ഷയ പ്രവർത്തകർ എന്നിവരുടെ സേവനം ഉപയോഗപ്പെടുത്താം. കൊവിഡ് മൂലമാണ് മരണമെന്ന് തെളിയിക്കുന്ന രേഖ, ഐ.സി.എം.ആർ സർട്ടിഫിക്കറ്റ്, ആധാർ കാർഡ്, റേഷൻ കാർഡ്, ബാങ്ക് പാസ് ബുക്ക് എന്നിവ അപേക്ഷയോടൊപ്പം സമർപ്പിക്കണം.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |