തൃശൂർ: കേവലം സിനിമാപ്രദർശനങ്ങൾക്കപ്പുറം സിനിമ കലാകാരന്മാരുടെ സർഗാത്മക കൂട്ടായ്മയാണ് ചലച്ചിത്രോത്സവങ്ങളെ സമ്പന്നമാക്കുന്നതെന്ന് മന്ത്രി കെ.രാജൻ പറഞ്ഞു. തൃശൂർ അന്താരാഷ്ട്ര ചലച്ചിത്രോത്സവം ഉദ്ഘാടനം ചെയ്യുകയായിരുന്നു അദ്ദേഹം. തൃശൂർ അന്താരാഷ്ട്ര ചലച്ചിത്രോത്സവത്തെ സംസ്ഥാന സർക്കാർ അംഗീകരിക്കുന്നതിന് വേണ്ട നടപടികൾ നടക്കുന്നുണ്ടെന്നും അടുത്ത തവണത്തെ ചലച്ചിത്രമേളയിലൂടെ അത് യാഥാർത്ഥ്യമാകുമെന്നും അദ്ദേഹം തുടർന്നു പറഞ്ഞു.
മേയർ എം.കെ.വർഗീസ് അദ്ധ്യക്ഷത വഹിച്ചു. വിജയ് മൂലെയ് ലൈഫ് ടൈം അച്ചീവ്മെന്റ് അവാർഡ് അമൃത് ഗാൻ ഗറിന് സമ്മാനിച്ചു. ഫെസ്റ്റിവൽ ബുക്ക് പ്രിയനന്ദൻ പ്രകാശനം ചെയ്തു. ടി.വി.ചന്ദ്രൻ മുഖ്യാതിഥിയായി. ഫെസ്റ്റിവൽ ഡയറക്ടർ പ്രേമേന്ദ്ര മജുംദാർ, പി.ബാലചന്ദ്രൻ എം.എൽ.എ, കെ.ജി.മോഹൻകുമാർ , ടി.കൃഷ്ണനുണ്ണി, പ്രകാശ് ശ്രീധർ, എക്സിക്യൂട്ടീവ് ഡയറക്ടർ ചെറിയാൻ ജോസഫ, എ.രാധാകൃഷ്ണൻ എന്നിവർ സംസാരിച്ചു. പി.അഭിജിത്തിന്റെ അന്തരം അന്താരാഷ്ട്ര ചലച്ചിത്രോത്സവത്തിലെ രണ്ടാം ദിവസം പ്രേക്ഷകരുടെ കൈയടി നേടി. ചെന്നൈയിൽ നിന്നുള്ള ട്രാൻസ് വുമൺ നേഹ മലയാളത്തിൽ ആദ്യമായി നായികയാകുന്ന സിനിമയുടെ കേരളത്തിലെ ആദ്യ പ്രദർശനമാണ് നടന്നത്. എ്ര്രയ് ഡൗൺ തൂഫാൻ മെയിൽ (ഹിന്ദി), ദ റോഡ് ടു കുത്രിയാർ (തമിഴ്), പാരലൽ മദേഴ്സ് (സ്പാനിഷ്), ചുരുളി (മലയാളം) എന്നീ സിനിമകളും പ്രദർശിപ്പിച്ചു.
തേക്കിൻകാട് ഫെസ്റ്റിന് തുടക്കം
തൃശൂർ : വിഭാഗീയതയ്ക്ക് അപ്പുറം കൂട്ടായ്മയുടെ വേദികൾ ഒരുക്കുന്ന മാനവികതയാണ് കലാപ്രവർത്തനമെന്ന് മന്ത്രി ഡോ.ആർ.ബിന്ദു. ആസാദി കാ അമൃത് മഹോത്സവത്തിന്റെ ഭാഗമായി സാംസ്കാരിക സ്ഥാപനങ്ങളെ ഏകോപിപ്പിച്ച് സാംസ്കാരിക ഉന്നത സമിതി സംഘടിപ്പിച്ച തേക്കിൻകാട് ഫെസ്റ്റിവൽ കാൻവാസിൽ ചിത്രം വരച്ച് ഉദ്ഘാടനം ചെയ്യുകയായിരുന്നു മന്ത്രി.
മനസുകളുടെ ഇഴയടുപ്പം വർദ്ധിപ്പിക്കാൻ സഹായിക്കുന്ന കൂട്ടായ്മയുടെ വേദികൾ ശക്തിപ്പെടുത്തണമെന്നും പരസ്പരം ഉൾക്കൊള്ളലിന്റെയും സഹവർത്തിത്വത്തിന്റെയും വേദികളിലൂടെ കലാകാരന്മാർ അവരുടെ സർഗ്ഗ പ്രവർത്തനം നടത്തണമെന്നും മന്ത്രി പറഞ്ഞു. സാംസ്കാരിക പ്രവർത്തക അനു പാപ്പച്ചൻ കെ.പി.എ.സി ലളിത അനുസ്മരണം നടത്തി. കൊച്ചിൻ ദേവസ്വം ബോർഡ് പ്രസിഡന്റ് വി. നന്ദകുമാർ, ലളിത കലാ അക്കാഡമി വൈസ് ചെയർമാൻ എ.ബി.എൻ ജോസഫ്, ഡോ.പ്രഭാകരൻ പഴശ്ശി, ലളിത കലാ അക്കാഡമി സെക്രട്ടറി ബാലമുരളീകൃഷ്ണൻ തുടങ്ങിയവർ പങ്കെടുത്തു. തുടർന്ന് സ്വാതന്ത്ര്യാനന്തര കേരളവും വികസനവും എന്ന വിഷയത്തിൽ ടി.ശശിധരൻ, ജോണി എന്നിവർ പ്രഭാഷണം നടത്തി. ഇന്ന് രാവിലെ 10ന് നടക്കുന്ന സെമിനാർ സാഹിത്യ അക്കാഡമി പ്രസിഡന്റ് കെ.സച്ചിദാനന്ദൻ ഉദ്ഘാടനം ചെയ്യും. മുരളി പെരുനെല്ലി എം.എൽ.എ അദ്ധ്യക്ഷത വഹിക്കും. വൈകീട്ട് അഞ്ചിന് നടക്കുന്ന സമാപന സമ്മേളനം മന്ത്രി കെ.രാജൻ ഉദ്ഘാടനം ചെയ്യും
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |