തൃശൂർ: കെ.പി.സി.സി ഒ.ബി.സി ഡിപ്പാർട്മെന്റ് അയ്യന്തോൾ ബ്ലോക്ക് കമ്മിറ്റിയുടെ ആഭിമുഖ്യത്തിൽ വിശ്വകർമ്മ ജയന്തി ആഘോഷം സംസ്ഥാന ജനറൽ സെക്രട്ടറി ജിതേഷ് ബലറാം ഉദ്ഘാടനം ചെയ്തു. ഒ.ബി.സി ഡിപ്പാർട്മെന്റ് അയ്യന്തോൾ ബ്ലോക്ക് ചെയർമാൻ എം.എസ്.രാജാറാം അദ്ധ്യക്ഷനായി. ഒ.ബി.സി ഡിപ്പാർട്മെന്റ് ജില്ലാ കമ്മിറ്റി അംഗം മനോജ് മച്ചാട്, ബാബുരാജ് ചേറൂർ, ഉണ്ണിക്കൃഷ്ണൻ കുളമ്പ്രത്, മണിക്കുട്ടൻ പാണ്ടിക്കാവ് തുടങ്ങിയവർ സംബന്ധിച്ചു.
യുവ ഉത്സവ് 29ന്
തൃശൂർ: കേന്ദ്ര യുവജനകാര്യ കായിക മന്ത്രാലയം ദേശവ്യാപകമായി സംഘടിപ്പിക്കുന്ന ദേശീയ യുവ ഉത്സവ് തൃശൂർ റീജ്യണൽ തിയേറ്ററിൽ 29ന് നടക്കും. നെഹ്രു യുവകേന്ദ്ര നാഷണൽ സർവീസ് സ്കീമിന്റെ സഹകരണത്തോടെ സംഘടിപ്പിക്കുന്ന പരിപാടിയുടെ ഭാഗമായി, യുവജന കൺവെൻഷൻ, പെയിന്റിംഗ് (ജലഛായ മത്സരം) കവിതാരചന, പ്രസംഗമത്സരം, മൊബൈൽ ഫോട്ടോഗ്രാഫി, നാടോടി സംഘനൃത്തം, യുവജനസംവാദം എന്നീ മത്സരങ്ങൾ നടക്കും. ലളിതകലാ അക്കാഡമിയുമായി ചേർന്ന് യുവചിത്രകലാ ക്യാമ്പുമുണ്ട്. വിജയികൾക്ക് സമ്മാനത്തുകയ്ക്കൊപ്പം പ്രശസ്തി പത്രവും ഉപഹാരവും നൽകും. ഒന്നും രണ്ടും സ്ഥാനക്കാർക്ക് സംസ്ഥാന - ദേശീയ ഉത്സവങ്ങളിൽ പങ്കെടുക്കാം. പ്രായപരിധി 15-29. സെപ്റ്റംബർ 25നകം രജിസ്റ്റർ ചെയ്യണം. രജിസ്ട്രേഷന് ഫോൺ: 9567835171, 7907764873.
മാദ്ധ്യമ സ്വാതന്ത്ര്യം കുറയുന്നു: ടി.എൻ.പ്രതാപൻ
തൃശൂർ: മാദ്ധ്യമ സ്വാതന്ത്ര്യം കുറഞ്ഞുവരികയാണെന്നും പല ശരിയായ കാര്യങ്ങളും തെറ്റാണെന്ന് പറയേണ്ട ഗതികേടിലാണ് മാദ്ധ്യമ പ്രവർത്തകരെന്നും ടി.എൻ.പ്രതാപൻ എം.പി പറഞ്ഞു. പ്രമുഖ പത്രപ്രവർത്തകനും ഇന്ത്യൻ ഫെഡറേഷൻ ഒഫ് വർക്കിംഗ് ജേണലിസ്റ്റ്സ് സെക്രട്ടറി ജനറലുമായിരുന്ന കെ.എം.റോയിയുടെ ഒന്നാം ചരമവാർഷിക അനുസ്മരണം പ്രസ്ക്ലബിൽ ഉദ്ഘാടനം ചെയ്യുകയായിരുന്നു എം.പി. ലീഡർ കെ.കരുണാകരനെ പോലെ ഏത് വിമർശനത്തെയും ചിരിച്ചുകൊണ്ട് നേരിട്ടിരുന്ന ശൈലി ഇന്ന് പല നേതാക്കളിലും ഇല്ലെന്നും പ്രതാപൻ വ്യക്തമാക്കി. കെ.യു.ഡബ്ല്യു.ജെ സംസ്ഥാന പ്രസിഡന്റ് എം.വി.വിനീത, ജില്ലാ പ്രസിഡന്റ് ഒ.രാധിക, ഫോറം സംസ്ഥാന സെക്രട്ടറി ബാലകൃഷ്ണൻ കുന്നമ്പത്ത്, ജില്ലാ പ്രസിഡന്റ് അലക്സാണ്ടർ സാം, ജില്ലാ സെക്രട്ടറി എൻ.ശ്രീകുമാർ, പ്രസ്ക്ലബ് സെക്രട്ടറി പോൾ മാത്യു തുടങ്ങിയവർ പങ്കെടുത്തു. സീനിയർ ജേണലിസ്റ്റ് ഫോറവും കെ.യു.ഡബ്ല്യു.ജെ ജില്ലാ കമ്മിറ്റിയും സഹകരിച്ചാണ് അനുസ്മരണം നടത്തിയത്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |