ധാക്ക: ഇന്ത്യയടക്കമുള്ള അയൽക്കാരെപ്പോലും അമ്പരിപ്പിച്ച് വൻ കുതിച്ചുചാട്ടവുമായി ബംഗ്ളാദേശ് സമ്പദ്‌വ്യവസ്ഥ. 2016 മുതൽ 2021 വരെ ശരാശരി 6.4 ശതമാനം വളർന്ന ബംഗ്ളാദേശ് 2040ഓടെ ഒരുലക്ഷം കോടി ഡോളർ സമ്പദ്‌മൂല്യത്തിലെത്തുമെന്ന് ബോസ്‌റ്റൺ കൺസൾട്ടിംഗ് ഗ്രൂപ്പിന്റെ റിപ്പോർട്ട് വ്യക്തമാക്കി.

നിലവിൽ 41,​600 കോടി ഡോളറാണ് മൂല്യം. ശരാശരി 5 ശതമാനം വാർഷിക വളർച്ചനിലനിറുത്തിയാൽ തന്നെ 2040ഓടെ ലക്ഷ്യം നേടാൻ ബംഗ്ളാദേശിന് കഴിയും. 2016-21 കാലയളവിലെ ശരാശരി വാർഷിക വളർച്ചാനിരക്കിൽ ചൈന,​ ഇന്ത്യ,​ ഇൻഡോനേഷ്യ,​ വിയറ്റ്‌നാം,​ ഫിലിപ്പൈൻസ് എന്നിവയെ ബംഗ്ളാദേശ് മറികടന്നിരുന്നു. 2015ൽ ബംഗ്ളാദേശ് 'ലോവർ ഇൻകം" എന്നതിൽ നിന്ന് 'ലോവർ-മിഡിൽ-ഇൻകം" രാജ്യമായി മാറിയിരുന്നു. ശരാശരി 28 വയസുള്ള തൊഴിലാളി സമൂഹമാണ് ബംഗ്ളാദേശിന്റെ മുന്നേറ്റത്തിന്റെ കരുത്ത്. 2031ൽ ബംഗ്ളാദേശ് 'അപ്പർ-മിഡിൽ-ഇൻകം" രാജ്യമാകുമെന്ന് കരുതപ്പെടുന്നു.

ലോകത്തെ ഏറ്റവും വേഗം വളരുന്ന വലിയ സമ്പദ്‌വ്യവസ്ഥയെന്ന പട്ടം ഇപ്പോഴും ഇന്ത്യയ്ക്ക് സ്വന്തമാണ്. 2010ൽ തന്നെ ഇന്ത്യ 'ലോവർ-മിഡിൽ-ഇൻകം" രാജ്യമായി മാറിയിരുന്നു. അതേസമയം,​ ബംഗ്ളാദേശിന്റെ ആളോഹരി വാർഷിക വരുമാനം നേരത്തെ തന്നെ ഇന്ത്യയെ കടത്തിവെട്ടിയിരുന്നു.

ബംഗ്ളാക്കരുത്ത്

 നിലവിൽ 41,​600 കോടി ഡോളറാണ് മൂല്യം.

 2040ഓടെ ഒരുലക്ഷം കോടി ഡോളർ സമ്പദ്‌മൂല്യത്തിലെത്തുമെന്ന് ബോസ്‌റ്റൺ കൺസൾട്ടിംഗ് ഗ്രൂപ്പ്.