കൊച്ചി: ആഗസ്റ്റ് 31 വരെ ജ്വല്ലറികളിൽ പരിശോധന,പിഴ തുടങ്ങി ഏതെങ്കിലും തരത്തിലുള്ള ശിക്ഷാ നടപടികൾ സ്വീകരിക്കില്ലെന്നും ഹാൾമാർക്കിംഗ് നടപടി ഘട്ടംഘട്ടമായി നടപ്പാക്കുമെന്നും ഉൾപ്പടെ ഉപഭോക്തൃകാര്യ മന്ത്രി പീയൂഷ് ഗോയലിന്റെ നേതൃത്വത്തിലെടുത്ത തീരുമാനങ്ങൾ സ്വാഗതംചെയ്യുന്നതായി ആൾ കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ സംസ്ഥാന കമ്മിറ്റി പ്രസിഡന്റ് ഡോ.ബി.ഗോവിന്ദൻ, ജനറൽ സെക്രട്ടറി കെ.സുരേന്ദ്രൻ, ട്രഷറർ അഡ്വ.എസ്.അബ്ദുൽ നാസർ എന്നിവർ അറിയിച്ചു.

 മറ്റ് തീരുമാനങ്ങൾ:

1. ആദ്യ ഘട്ടത്തിൽ, ഇന്ത്യയിലെ 741 ജില്ലകളിൽ കുറഞ്ഞത് 1 ഹാൾമാർക്കിംഗ് കേന്ദ്രമുള്ള 256 ജില്ലകളിൽ മാത്രമേ നിർബന്ധിത ഹാൾമാർക്കിംഗ് നടപ്പിലാക്കുകയുള്ളൂ. ജില്ലകളുടെ പട്ടിക ഉടൻ ബി‌ഐ‌എസ് വെബ്‌സൈറ്റിൽ അപ്‌ലോഡ് ചെയ്യും. 2. ഒരിക്കൽ മാത്രം രജിസ്ട്രേഷൻ എടുത്താൽ മതിയാകും. കാലാവധി കഴിഞ്ഞു പുതുക്കുന്നതിന് യാതൊരു ഫീസും അടക്കേണ്ടതില്ല. 3. 40 ലക്ഷംരൂപ വരെ വാർഷിക വിറ്റുവരവുള്ള ജ്വല്ലറികളെ നിർബന്ധിത ഹാൾമാർക്കിംഗിൽ നിന്ന് ഒഴിവാക്കും. 4. 2021 ഓഗസ്റ്റ് 31 വരെ ജ്വല്ലറികളിൽ പരിശോധന,പിഴ, , പിടിച്ചെടുക്കൽ, തുടങ്ങി ഏതെങ്കിലും തരത്തിലുള്ള ശിക്ഷാ നടപടികൾ സ്വീകരിക്കില്ല. 5. ഇന്ത്യാ ഗവൺമെന്റിന്റെ ട്രേഡ് പോളിസി അനുസരിച്ച് ആഭരണങ്ങൾ കയറ്റുമതി ചെയ്യുകയും വീണ്ടും ഇറക്കുമതി ചെയ്യുകയും ചെയ്യുക - അന്താരാഷ്ട്ര എക്സിബിഷനുകൾക്കുള്ള ആഭരണങ്ങൾ, സർക്കാർ അംഗീകാരമുള്ള ബി 2 ബി ആഭ്യന്തര എക്സിബിഷനുകൾക്കുള്ള ആഭരണങ്ങൾ എന്നിവയും നിർബന്ധിത ഹാൾമാർക്കിംഗിൽ നിന്ന് ഒഴിവാക്കും. 6. 20, 23, 24 എന്നീ കാരറ്റിലുള്ള സ്വർണാഭരങ്ങളും ഹാൾമാർക്കിംഗിന്റെ പരിശുദ്ധിയിൽ ഉൾപ്പെടുത്തും. 7. വാച്ചുകൾ, പേനകൾ, പ്രത്യേക തരം ആഭരണങ്ങളായ. കുന്തൻ, പോൾകി, ജാദോ എന്നിവ ചെ ഹാൾമാർക്കിംഗിൽ നിന്ന് ഒഴിവാക്കും. 8. ജ്വല്ലറികൾക്ക് ഉപഭോക്താവിൽ നിന്ന് ഹാൾമാർക്കിംഗ് മുദ്രയില്ലാത്ത പഴയ സ്വർണ്ണാഭരണങ്ങൾ തിരികെ വാങ്ങുന്നത് തുടരാം. 9. ഹാൾ മാർക്കിംഗ് നടപ്പാക്കുമ്പോൾ ഉണ്ടാകാനിടയുള്ള പ്രശ്നങ്ങൾ പരിശോധിക്കുന്നതിനായി അസോസിയേഷൻ പ്രതിനിധികളുടെയും , BlS ഉദ്യോഗസ്ഥരുടെയും നിയമ വിദഗ്ധരുടെയും പ്രതിനിധികൾ ഉൾപ്പെടുന്ന ഒരു കമ്മിറ്റി രൂപീകരിക്കും. 10. ഹാൾമാർക്ക് ചെയ്ത ആഭരണങ്ങളിൽ 2 ഗ്രാം വരെയുള്ള മാറ്റങ്ങൾ അനുവദിക്കും. 11. സ്വർണപ്പണിക്കാർക്ക് ഹാൾമാർക്കിംഗ് നിർബന്ധമില്ല 12. സ്വർണ വ്യാപാര ശാലകളുടെ പുറത്ത് “ഹാൾമാർക്ക് ചെയ്ത ആഭരണങ്ങൾ ഇവിടെ ലഭ്യമാണ് " എന്ന ബോർഡുകൾ പ്രദർശിപ്പിക്കണം. 13.. ജ്വല്ലറികൾക്ക് HUID ബാധകമല്ല.