കൊൽക്കത്ത: പശ്ചിമ ബംഗാളിലെ ബർദ്വാനിൽ ഇരട്ട സഹോദരന്മാർക്ക്​ കാമ്പസ്​ സെലക്ഷനിലൂടെ ഉയർന്ന പാക്കേജിൽ ജോലി.ആന്ധ്രപ്രദേശ്​ എസ്​.ആർ.എം സർവകലാശാലയിലെ ബി ടെക്​ കമ്പ്യൂട്ടർ സയൻസ്​ വിദ്യാർത്ഥികളായ സപ്​തർഷി മജൂംദാറിനും രാജർഷി മജൂംദാറിനുമാണ് 50 ലക്ഷം രൂപ വാർഷിക ശമ്പളത്തിൽ ജോലി ലഭിച്ചത്. ചെറുപ്പം മുതൽ എല്ലാകാര്യത്തിലും സഹോദരന്മാർ ഒരുമിച്ചാണ്. ഇപ്പോഴിതാ, ഒരുമിച്ച് ജോലി ചെയ്യാനുള്ള അവസരവും ലഭിച്ചിരിക്കുകയാണ്.

ഗൂഗിൾ ജപ്പാനുമായി ചേർന്ന്​ പ്രവർത്തിക്കുന്ന പി.വി.പി കമ്പനിയാണ്​ ഇരുവർക്കും ജോലി വാഗ്​ദാനം ചെയ്​തത്​. ആന്ധ്രാപ്രദേശിൽ ബിരുദം പൂർത്തിയാക്കിയ വിദ്യർത്ഥികൾക്ക്​ ലഭിക്കുന്ന ഏറ്റവും ഉയർന്ന പാക്കേജാണ്​ ഇത്​.

പിതാവിന്റെ ജോലി ആവശ്യത്തെ തുടർന്ന്​ ഞങ്ങൾ വളർന്നത്​ ഝാർഖണ്ഡിലായിരുന്നു. പ്രാഥമിക വിദ്യാഭ്യാസം അവിടെ പൂർത്തിയാക്കി. തുടർന്ന്​ എൻജിനിയറിംഗ്​ പഠനത്തിനായി എസ്​.ആർ.എം സർവകലാശാലയിലെത്തുകയായിരുന്നു' -സഹോദരന്മാർ പറഞ്ഞു.

എസ്​.ആർ.എമ്മിലെ ആദ്യ ബാച്ച്​ എൻജിനിയറിംഗ്​ വിദ്യാർത്ഥികൾ കൂടിയാണ്​ ഇരുവരും. സാധാരണയായി വിദ്യാർത്ഥികൾക്ക്​ ഏഴുലക്ഷം രൂപ വാർഷിക വരുമാനം ലഭിക്കുന്ന ജോലിയാണ്​ ലഭിക്കുക. ഇത്​ സർവകലാശാലയിലെതന്നെ ഉയർന്ന നേട്ടമായാണ്​ കണക്കാക്കുന്നത്​. തുടർന്ന്​ സർവകലാശാല ഇരുവർക്കും രണ്ടുലക്ഷം രൂപ സമ്മാനവും പ്രഖ്യാപിച്ചു.

വലിയൊരു ജോലി ലഭിക്കുമെന്ന്​ ഞങ്ങൾ ഇരുവരും കരുതിയിരുന്നില്ല. ഞങ്ങളുടെ വളർച്ചയും വിദ്യാഭ്യാസവുമെല്ലാം ഒരുമിച്ചായിരുന്നു. ഇനി ഒരുമിച്ച്​ ജോലിയും ചെയ്യും' -സപ്​തർഷി പറഞ്ഞു.