മംഗളൂരു: കൊവിഡ് ബാധിച്ചെന്ന് ഭയന്ന് ആത്മഹത്യ ചെയ്ത ദമ്പതികൾക്ക് കൊവിഡില്ലെന്ന് പരിശോധനാഫലം. സൂറത്കലിലെ അപ്പാർട്ട്‌മെന്റിൽ കഴിയുന്ന രമേഷ് (40), സുവർണ (35) എന്നിവരാണ് കഴിഞ്ഞ ദിവസം കൊവിഡ് ലക്ഷണങ്ങളുടെ പേരിൽ ആത്മഹത്യ ചെയ്തത്.

കൊവിഡ് ഭീതിമൂലമാണ് ആത്മഹത്യ ചെയ്യുന്നതെന്ന് ആത്മഹത്യകുറിപ്പിലുണ്ടെങ്കിലും ഇരുവരും മറ്റ് അസുഖങ്ങളാൽ ബുദ്ധിമുട്ടിയിരുന്നതായും കുട്ടികളില്ലാത്തതിൽ അസ്വസ്ഥരായിരുന്നുവെന്നും സുഹൃത്തുക്കളും അയൽവാസികളും വ്യക്തമാക്കി.

ആത്മഹത്യയ്ക്ക് തൊട്ടുമുമ്പ് പൊലീസുമായി ബന്ധപ്പെട്ട രമേശ് ആത്മഹത്യ സൂചന നൽകിയിരുന്നു.

ഇത് സംബന്ധിച്ച് പൊലീസ് പറയുന്നതിങ്ങനെ:

''പൊലീസ് ഉദ്യോഗസ്ഥനായ ശശികുമാറിനെ രാവിലെ 6.45 ഓടെ രമേശ് വിളിക്കുന്നത്. ജീവിതം അവസാനിപ്പിക്കാൻ രാത്രിയിൽ ഭാര്യ ഉറക്ക ഗുളിക കഴിച്ചെങ്കിലും വിജയിച്ചില്ലെന്നും അതോടെ രാവിലെ തൂങ്ങിമരിച്ചെന്നും വെളിപ്പെടുത്തിയ രമേശ് താനും തൂങ്ങിമരിക്കാൻ പോവുകയാണെന്നും പറഞ്ഞു. തങ്ങൾക്ക് കൊവിഡ് പോസിറ്റീവ് ആണെന്ന് ദമ്പതികൾ സംശയം പ്രകടിപ്പിച്ചിരുന്നു. രമേശിനെ പിന്തിരിപ്പിക്കാൻ ശ്രമിച്ചെങ്കിലും അദ്ദേഹം കോൾ കട്ട് ചെയ്യുകയായിരുന്നുവെന്ന്' ശശികുമാർ മാദ്ധ്യമങ്ങളോട് പറഞ്ഞു. ഉടനെ തന്നെ പൊലീസ് രമേശിന്റെ വീട് കണ്ടെത്താൻ ശ്രമം ആരംഭിച്ചു. രാവിലെ 7.10 ഓടെ പൊലീസ് രമേശിന്റെ വീട് കണ്ടെത്തി വാതിൽ പൊളിച്ച് അകത്ത് പ്രവേശിച്ചപ്പോഴേക്കും ഇരുവരും ജീവൻ വെടിഞ്ഞിരുന്നു.

പൊലീസിന് അയച്ച ശബ്ദസന്ദേശത്തിലും രമേശ് ചിലകാര്യങ്ങൾ പങ്കുവച്ചിരുന്നു. കഴിഞ്ഞ കുറച്ച് ദിവസങ്ങളായി കൊവിഡ് ലക്ഷണങ്ങൾ ഉണ്ട്. ഭാര്യയ്ക്ക് പ്രമേഹം ബാധിച്ചതിനാൽ രോഗത്തെ വല്ലാതെ ഭയപ്പെട്ടിരുന്നു. അന്ത്യകർമങ്ങൾക്കായി ഒരു ലക്ഷം രൂപ വീട്ടിൽ സൂക്ഷിച്ചിട്ടുണ്ട്. 2000 ലാണ് ഇരുവരും വിവാഹിതരായത്. 2002 ൽ ഒരു ആൺകുഞ്ഞ് ജനിച്ചെങ്കിലും 12 ദിവസങ്ങൾക്ക് ശേഷം മരിച്ചു. 2005 വീണ്ടും ഗർഭിണിയായെങ്കിലും അലസി. തുടർന്ന് ചികിത്സകൾ നടത്തിയെങ്കിലും ഗർഭം ധരിക്കാനായില്ല. മാനസിക വിഷമങ്ങൾ അനുഭവിച്ചിരുന്ന ഇരുവർക്കും കൊവിഡ് രോഗലക്ഷണങ്ങൾ പ്രകടമായതോടെയാണ് ജീവിതം അവസാനിപ്പിക്കാൻ തീരുമാനിച്ചത്. ദമ്പതികൾ അവരുടെ അപ്പാർട്ട്‌മെന്റ് പാവപ്പെട്ടവർക്ക് നൽകണമെന്ന് പറഞ്ഞതായി ശബ്ദ സന്ദേശത്തിലുണ്ടെന്ന് പൊലീസ് പറഞ്ഞു.

ആത്മഹത്യാക്കുറിപ്പിനൊപ്പം ഒരു ലക്ഷം രൂപ കണ്ടെത്തിയതായി പൊലീസ് പറഞ്ഞു. കൂടുതൽ അന്വേഷണത്തിന് ശേഷം പണം കുടുംബത്തിന് കൈമാറും.