SignIn
Kerala Kaumudi Online
Saturday, 20 April 2024 5.34 AM IST

സുപ്രീംകോടതിയിൽ പുതിയ ഒൻപത് ജഡ്ജിമാർ: ജസ്റ്റിസ് നാഗരത്‌ന 2027ൽ ആദ്യ വനിതാ ചീഫ് ജസ്റ്റിസാകും

nagaratna

ന്യൂഡൽഹി: സുപ്രീം കോടതി ചീഫ് ജസ്റ്റിസ് പദവിയിൽ ആദ്യമായി ഒരു വനിത എത്താൻ വഴിതുറന്ന് ചീഫ് ജസ്റ്റിസ് എൻ.വി. രമണ അദ്ധ്യക്ഷനായ കൊളീജിയം ശുപാർശ ചെയ്ത ഒൻപതുപേരെ സുപ്രീംകോടതി ജഡ്ജിമാരാക്കാൻ കേന്ദ്രം തീരുമാനിച്ചു. കേരള ഹൈക്കോടതിയിൽ നിന്ന് ജസ്റ്റിസ് സി.ടി.രവികുമാർ സുപ്രീംകോടതി ജഡ്ജിയാവും.

നിലവിൽ കർണാടക ഹൈക്കോടതി ജഡ്ജിയും സുപ്രീം കോടതി മുൻ ചീഫ് ജസ്റ്റിസ് ഇ.എസ്.വെങ്കട്ടരാമയ്യയുടെ മകളുമായ ജസ്റ്റിസ് ബി.വി. നാഗരത്നയാണ് (58) ഭാവിയിൽ (2027) വനിതാ ചീഫ് ജസ്റ്റിസാകാൻ സാദ്ധ്യത. മറ്റു രണ്ടു വനിതകൾകൂടി പട്ടികയിൽ ഉള്ളതിനാൽ മൂന്നു വനിതകൾ ഒരേസമയം,സുപ്രീംകോടതിയിൽ ജഡ്ജിമാരാകുന്നു എന്ന സവിശേഷതയും കൈവരും.ജസ്റ്റിസ് ഹിമ കൊഹ്‌ലി, ജസ്റ്റിസ് ബേല ത്രിവേദി എന്നിവരാണ് മറ്റു രണ്ടു വനിതകൾ.

നിലവിൽ ജസ്റ്റിസ് ഇന്ദിരാ ബാനർജി മാത്രമാണുള്ളത്. വനിതാജഡ്ജിമാരുടെ എണ്ണം നാലായി ഉയരുകയും ചെയ്യും.

ഒൻപതുപേരും ഈ മാസം 31ന് സ്ഥാനമേൽക്കാനാണ് സാദ്ധ്യത. ഇതോടെ സുപ്രീംകോടതിയിൽ 33 ജഡ്ജിമാരാകും.

പട്ടികയിലുള്ള മുൻ അഡിഷണൽ സോളിസിറ്റർ ജനറൽ പി.എസ്. നരസിംഹം, ജസ്റ്റിസ് വിക്രംനാഥ് എന്നിവരും ഭാവിയിൽ ചീഫ് ജസ്റ്റിസുമാരാകും. സുപ്രീംകോടതിയുടെ ചരിത്രത്തിൽ ആദ്യമായാണ് ഇത്രയും ജഡ്ജിമാരെ ഒരുമിച്ച് നിയമിക്കുന്നത്.

22 മാസത്തിന് ശേഷമാണ് പുതിയ നിയമനത്തിന് ജഡ്ജിമാരായ യു.യു.ലളിത്, എ.എം.ഖാൻവിൽക്കർ, ഡി.വൈ. ചന്ദ്രചൂഡ്, എൽ. നാഗേശ്വരറാവു എന്നിവർ കൂടി ഉൾപ്പെട്ട കൊളീജിയം ശുപാ‌ർശ നൽകിയതും കേന്ദ്ര സർക്കാർ അംഗീകരിച്ചതും.

പുതിയ ജഡ്ജിമാർ

  • ജസ്റ്റിസ് ബി.വി. നാഗരത്ന (58):കർണാടക ഹൈക്കോടതി ജഡ്ജി.സുപ്രീംകോടതി മുൻ ചീഫ് ജസ്റ്റിസ് ഇ.എസ്.വെങ്കട്ടരാമയ്യയുടെ മകൾ.കർണാടക സ്വദേശി​
  • ജസ്റ്റിസ് ഹിമ കൊഹ്‌ലി (62):തെലങ്കാന ഹൈക്കോടതിയിലെ ആദ്യ വനിതാ ചീഫ് ജസ്റ്റിസ്. ഡൽഹി സ്വദേശി
  • ജസ്റ്റിസ് ബേല ത്രിവേദി (61): ഗുജറാത്ത് ഹൈക്കോടതി ജഡ്ജി. ഗുജറാത്ത് സ്വദേശി
  • ജസ്റ്റിസ് സി.ടി. രവികുമാർ (61): കേരള ഹൈക്കോടതിയിലെ മുതിർന്ന ജഡ്ജിമാരിൽ രണ്ടാമൻ
  • ജസ്റ്റിസ് അഭയ് ശ്രീനിവാസ് ഓഖ (61) : കർണാടക ഹൈക്കോടതി ചീഫ് ജസ്റ്റിസ്. മഹാരാഷ്ട്ര സ്വദേശി
  • ജസ്റ്റിസ് വിക്രംനാഥ് (59):ഗുജറാത്ത് ഹൈക്കോടതി ചീഫ് ജസ്റ്റിസ്.ഉത്തർപ്രദേശ് സ്വദേശി. ഭാവിയിൽ സുപ്രീംകോടതി ചീഫ് ജസ്റ്റിസ്
  • ജസ്റ്റിസ് ജതേന്ദ്രകുമാർ മഹേശ്വരി (60): സിക്കിം ഹൈക്കോടതി ചീഫ് ജസ്റ്റിസ്. മദ്ധ്യപ്രദേശ് സ്വദേശി
  • ജസ്റ്റിസ് എം.എം. സുന്ദരേശ് (59): മദ്രാസ് ഹൈക്കോടതിയിലെ മുതിർന്ന ജഡ്ജിമാരിൽ മൂന്നാമൻ.തമിഴ്നാട് ഈറോഡ് സ്വദേശി.
  • പി.എസ്. നരസിംഹ (58):മുൻ അഡിഷണൽ സോളിസിറ്റർ ജനറൽ (2014 -18). ഭാവി സുപ്രീംകോടതി ചീഫ് ജസ്റ്റിസ്.

അപ്ഡേറ്റായിരിക്കാം ദിവസവും


ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ

TAGS: NEWS 360, NATIONAL, NATIONAL NEWS, SUPREME COURT
KERALA KAUMUDI EPAPER
TRENDING IN NEWS 360
PHOTO GALLERY
TRENDING IN NEWS 360
X
Lorem ipsum dolor sit amet
consectetur adipiscing elit, sed do eiusmod tempor incididunt ut labore et dolore magna aliqua. Ut enim ad minim veniam, quis nostrud exercitation ullamco laboris nisi ut aliquip ex ea commodo consequat.
We respect your privacy. Your information is safe and will never be shared.