ന്യൂഡൽഹി: സർക്കാർ സ്ഥാനങ്ങളിൽ നിന്ന് ലഭ്യമാക്കുന്ന ജാതി സർട്ടിഫിക്കറ്റിന്റെ വിശ്വാസ്യത ഉറപ്പാക്കാൻ വീണ്ടും വീണ്ടുമുള്ള പരിശോധന പട്ടികജാതി - പട്ടിക വർഗക്കാരെ ദ്രോഹിക്കുന്നതിന് തുല്യമെന്ന് സുപ്രീംകോടതി. ജാതി സർട്ടിഫിക്കറ്റ് ചെന്നൈ ജില്ലാ വിജിലൻസ് കമ്മിറ്റി റദ്ദാക്കിയതിനെതിരെ ജെ.ചിത്ര സുപ്രീംകോടതിയിൽ ഫയൽ ചെയ്ത റിട്ട് ഹർജിയിലാണ് ജസ്റ്റിസ്‌മാരായ എൽ.നാഗേശ്വര റാവു,​ അനിരുദ്ധ ബോസ് എന്നിവരുടെ ബെഞ്ചിന്റെ നിരീക്ഷണം.
വീണ്ടുമുള്ള അന്വേഷണങ്ങൾ കൃത്രിമം തടയാനാണെങ്കിലും ഫലം ഉപദ്രവമാണ്. നിയമം ലംഘിച്ചെന്ന് തെളിഞ്ഞാൽ മാത്രം തുടർപരിശോധന നടത്തണമെന്നും കോടതി വ്യക്തമാക്കി. ചെന്നൈ ജില്ലാ വിജിലൻസ് കമ്മിറ്റിയുടെ ഉത്തരവും സുപ്രീംകോടതി റദ്ദാക്കി.