ലക്നൗ: കർണാടകയിൽ മുഖ്യമന്ത്രി ​ബസവരാജ്​ ബൊമ്മൈയെ മുൻനിറുത്തി 2023ലെ നിയമസഭ തിരഞ്ഞെടുപ്പിനെ നേരിടുമെന്ന്​ കേന്ദ്ര ആഭ്യന്തരമന്ത്രി അമിത് ഷാ. കർണാടകയിൽ വിവിധ പദ്ധതികളുടെ ഉദ്​ഘാടനം നിർവഹിക്കുകയായിരുന്നു അദ്ദേഹം. മുഖ്യമന്ത്രിയായി ബൊമ്മൈയെ ഉയർത്തിക്കാട്ടുകയാണെങ്കിൽ ബി.ജെ.പി അനായാസം ജയിക്കും. ബൊമ്മൈയുടെ ഭരണം കർണാടകയിൽ ബി.ജെ.പിയുടെ പ്രതിച്ഛായ വർദ്ധിപ്പിച്ചു - ഷാ പറഞ്ഞു. മുൻ മുഖ്യമന്ത്രി ബി.എസ്​.യെദിയൂരപ്പ കർണാടകയുടെ വികസനങ്ങൾക്ക്​ ആരംഭമിട്ടെന്നും ബൊമ്മൈ അവ ഏറ്റെടുത്ത്​ മികച്ച രീതിയിൽ മുന്നോട്ടുകൊണ്ടുപോകുകയാണെന്നും ഷാ പറഞ്ഞു. ഒരു പുതിയ വ്യക്തിയെ അധികാരമേൽപ്പിക്കുകയെന്നത്​ യെദിയൂരപ്പയുടെ സ്വന്തം തീരുമാനമായിരുന്നു. ബൊമ്മൈ ആ ഉത്തരവാദിത്വം ഭംഗിയായി ഏറ്റെടുക്കുകയും ഭരണം സുഗമമായി നടത്തുകയും ചെയ്യുന്നുണ്ടെന്നും ഷാ പറഞ്ഞു.