ന്യൂഡൽഹി: ഉഗാണ്ട, റുവാണ്ട എന്നീ രാജ്യങ്ങളിലേക്കുള്ള ഔദ്യോഗിക സന്ദർശനത്തിനായി കേന്ദ്ര വിദേശകാര്യ സഹമന്ത്രി വി. മുരളീധരൻ യാത്ര തിരിച്ചു. ഇന്ന് മുതൽ 15 വരെയാണ് സന്ദർശനം. ഉഗാണ്ടയുടെ വിദേശകാര്യ മന്ത്രി ജനറൽ ജെ. ജെ. ഒഡോംഗോയുമായും സ്പീക്കർ ജേക്കബ്ബ് ഔലാനിയയുമായും മന്ത്രി ഉഭയകക്ഷി ചർച്ചകൾ നടത്തും. ഉഗാണ്ടൻ പ്രസിഡന്റ് യോവേരി കഗുട്ട മുസെവേനിയെയും സന്ദർശിക്കും. ഉഗാണ്ടയിലെ വ്യാപാര സമൂഹവുമായും ഇന്ത്യൻ സമൂഹവുമായും സംവദിക്കും.

14, 15 തിയതികളിലായി നടക്കുന്ന റുവാണ്ടൻ സന്ദർശനത്തിനിടെ പ്രഥമ ഇന്ത്യാ –റുവാണ്ട ജോയിന്റ് കമ്മിഷൻ യോഗത്തിൽ ഉഗാണ്ടയുടെ വിദേശകാര്യ, അന്താരാഷ്ട്ര സഹകരണ മന്ത്രി ഡോ. വിൻസെന്റ് ബിറൂട്ടക്കൊപ്പം വി. മുരളീധരൻ സഹ അദ്ധ്യക്ഷനാകും. റുവാണ്ടൻ പ്രസിഡന്റ് പോൾ കഗാമെയെയും സന്ദർശിക്കും. ഭാരത സർക്കാരിന്റെ സഹായത്തോടെ സ്ഥാപിച്ച ഇന്ത്യ- റുവാണ്ട സംരംഭകത്വ വികസന കേന്ദ്രം മന്ത്രി ഉദ്ഘാടനം ചെയ്യും. കിഗാലിയിലെ വംശഹത്യാ സ്മാരകവും സന്ദർശിക്കും.