സിംഗപ്പൂർ: ഇന്ത്യ-ചൈന ബന്ധം വഷളായ നിലയിലാണ്​ കടന്നുപോകുന്നതെന്ന്​ വിദേശകാര്യ മ​ന്ത്രി എസ്​. ജയശങ്കർ പറഞ്ഞു.

ബീജിംഗ് നിരന്തരം ഉടമ്പടികൾ ലംഘിച്ച് പല നടപടികളുമെടുത്തു. ഇതേക്കുറിച്ച്​ അവർക്ക്​ ഇപ്പോഴും കൃത്യമായ വിശദീകരണമില്ല. ഉഭയകക്ഷി ബന്ധം എന്തായി തീരണം എന്നത്​ ഇപ്പോൾ ചൈനീസ്​ നേതൃത്വമാണ്​ തീരുമാനിക്കേണ്ടതെന്നും" അദ്ദേഹം കൂട്ടിച്ചേർത്തു.

സിംഗപ്പൂരിൽ 'പുതുലോകക്രമം' സംബന്ധിച്ച്​ നടന്ന സാമ്പത്തിക ഫോറത്തിനിടെ ഒരു ചോദ്യത്തിന് മറുപടി പറയുകയായിരുന്നു അദ്ദേഹം.

"കിഴക്കൻ ലഡാക്കിലെ സൈനിക പിന്മാറ്റം സമാധാനം പുനഃസ്ഥാപിക്കാൻ അനിവാര്യമാണെന്ന്​ ഇന്ത്യ ചൈനയോട്​ പറഞ്ഞിട്ടുണ്ട്​. വികസനം, ഉഭയകക്ഷി ബന്ധം മെച്ചപ്പെടൽ തുടങ്ങിയ കാര്യങ്ങൾക്കെല്ലാം ഇത്​ പ്രധാനമാണ്​. ഇന്ത്യയുടെ നിലപാടിൽ ചൈനയ്ക്ക്​ ഒരു സംശയവുമുണ്ടാകില്ല. ഞാൻ ചൈനീസ്​ വിദേശകാര്യമന്ത്രി വാങ്​ യിയുമായി നിരവധി തവണ കൂടിക്കാഴ്ച നടത്തി. ഞാൻ വ്യക്തമായാണ്​ കാര്യങ്ങൾ പറഞ്ഞുകൊണ്ടിരിക്കുന്നത്​. അവർക്ക്​ കേൾക്കാൻ താൽപര്യമുണ്ടെങ്കിൽ അത്​ മനസിലായിരിക്കും."​ ​ജയ്ശങ്കർ വ്യക്തമാക്കി.

ലോകശക്തികളുടെ അധികാര ക്രമത്തിൽ മാറ്റങ്ങളുണ്ടാകുന്നുണ്ട്​ എന്നത്​ ശരിയാണെങ്കിലും ചൈന അമേരിക്കയ്ക്ക്​ ബദൽ ആവുകയാണ്​ എന്ന വാദത്തിൽ കഴമ്പില്ലെന്നും അദ്ദേഹം ചൂണ്ടിക്കാട്ടി.