പത്താൻകോട്ട്​: പഞ്ചാബിലെ പത്താൻകോട്ടിൽ സൈനിക കേന്ദ്രത്തിന്​ സമീപം അജ്ഞാതരുടെ ഗ്രനേഡാക്രമണം. ദീരുപുളിലെ സൈന്യത്തിന്റെ ത്രിവേണി ഗേറ്റിന്​ മുന്നിൽ തിങ്കളാഴ്ച അർദ്ധരാത്രിയോടെയാണ് ആക്രമണമുണ്ടായതെന്ന് പ്രതിരോധസേന വൃത്തങ്ങൾ അറിയിച്ചു. ആളപായമില്ല. ഒരു വിവാഹ പാർട്ടി കേന്ദ്രത്തിന് മുന്നിലൂടെ കടന്നു പോകുമ്പോഴായിരുന്നു ആക്രമണമുണ്ടായതെന്നാണ് റിപ്പോർട്ടുകൾ. ഉടൻ തന്നെ പൊലീസ്​ സ്ഥലത്തെത്തി. സി.സി.ടി.വി ദൃശ്യങ്ങൾ പരിശോധിച്ച്​ വരികയാണെന്നും ചെക്​പോസ്റ്റുകളിൽ കനത്ത ജാഗ്രത നിർദ്ദേശം നൽകിയിട്ടുണ്ടെന്നും അന്വേഷണം പുരോഗമിക്കുകയാണെന്നും പൊലീസ്​ അറിയിച്ചു. ഗ്രനേഡിന്റെ ചില ഭാഗങ്ങൾ സംഭവസ്ഥലത്ത്​ നിന്ന്​ കണ്ടെടുത്തിട്ടുണ്ട്​​. കേസിൽ അന്വേഷണം തുടരുകയാണെന്ന് അധികൃതർ പറഞ്ഞു.