അമൃത്സർ: പറക്കാൻ ആഗ്രഹിച്ച് നിന്ന കുട്ടിക്കൂട്ടത്തിന് മുന്നിലേക്ക് ദാ ഹെലികോപ്ടർ പറന്നിറങ്ങി. അമ്പരന്ന് നിന്ന കുട്ടികളെ കോപ്ടറിലേക്ക് കൈപിടിച്ച് കയറ്റിയത് സാക്ഷാൽ പഞ്ചാബ് മുഖ്യമന്ത്രി ചരൺജീത് സിംഗ് ഛന്നി. ആർത്തുവിളിച്ച് ആകാശം ചുറ്റി കുട്ടികൾ ഹാപ്പി. മുഖ്യമന്ത്രിക്ക് ഇരട്ടി സന്തോഷം.

മൊറിൻഡയിലെ കുട്ടികൾക്കൊപ്പമാണ് പഞ്ചാബ് മുഖ്യൻ ഹെലികോപ്ടർ സവാരി നടത്തിയത്. യാത്രയുടെ ദൃശ്യങ്ങൾ അദ്ദേഹം ട്വീറ്റ് ചെയ്തു.

'ജനങ്ങൾക്ക് വേണ്ടി, ജനങ്ങളുടെ സർക്കാർ,

മൊറിൻഡയിലെ കുട്ടികളുമായി ഹെലികോപ്ടർ റൈഡ് പങ്കിടുന്നതിൽ സന്തോഷമുണ്ട്. എല്ലാ മേഖലകളിലും തുല്യ അവസരങ്ങൾ നൽകി അവർക്ക് ശോഭനവും സമൃദ്ധവുമായ ഭാവി ഉറപ്പാക്കാനാണ് എന്റെ ശ്രമം. വീണ്ടും ഹെലികോപ്ടർ യാത്ര സംഘടിപ്പിക്കും. കൂടുതൽ കുട്ടികൾക്ക് പറക്കാൻ അവസരം നൽകുമെന്നും' അദ്ദേഹം പറഞ്ഞു.അവർക്ക് ഇത് പുതിയ അനുഭവമായിരുന്നു. അവരുടെ ആഹ്ളാദം കാണുമ്പോൾ വലിയ സന്തോഷമുണ്ട്' ഛന്നി കൂട്ടിച്ചേർത്തു.

നിയമസഭാ തിരഞ്ഞെടുപ്പിന് മാസങ്ങൾ മാത്രം ശേഷിക്കെ ക്യാപ്ടൻ അമരീന്ദർ സിംഗ് രാജിവച്ചതിനെ തുടർന്ന് സെപ്തംബറിലാണ് ഛന്നി പഞ്ചാബ് മുഖ്യമന്ത്രിയായി സ്ഥാനമേറ്റത്. ആകാശയാത്രയുടെ വിഡിയോ പങ്കുവച്ച് മുഖ്യമന്ത്രി ട്വീറ്റ് ചെയ്തു.